Saemien kultuvrejielemekonferanse öörnesåvva Diehtosiidesne Guovdageaidnusne njoktjen 15. jïh 16.b., jïh lea akte sjugniedihks sijjie gusnie saemien kultuvregïehtelimmieh orre åssjalommesh åadtjoeh, dååjrehtimmieh juekieh jïh gïehtelimsnuepieh åadtjoeh , gusnie jïjtse gïehtelimsviermiem jïh sïeltenuepieh evtede.
- Tjåanghkoesijjiem utnedh kultuvrejielemeaktööride, politihkeridie jïh jeatjabidie lea vihkeles juktie orrestamme daajroem åadtjodh, jïh Saemiedigkien gaavhtan maehtedh aktem orre politihkem evtiedidh båetijen aajkan. Daate konferanse sæjhta aalkojne årrodh Saemiedægkan juktie barkojne nierhkedh aktine orre jielemepolitihkine, Wollmann Magga jeahta.
Kultuvrejielemh leah akte dejstie laanten gieltegommes jïh verkemes sjïdtije jieliemijstie. Saemien siebriedahkesne daate akte jieleme guhkies aerpievuekiejgujmie, jïh akte jieleme stoerre nuepine. Daan biejjien almetjh abpe laanteste mah aktem barkoem sjugniedieh sijjen tjeahpoe- jïh kultuvrevuekeste.
Saemiedigkieraerien maadthvuajnoen mietie edtjebe aktem nænnoes jïh gellielaaketje jielemem utnedh mij våaroeminie åtna jïh krööhkeste saemien kultuvrem, gïelem, siebriedahkem, eatnemem jïh byjresem, jïh våaroeminie beaja jielije jïh nænnoes daajbaaletje voenges siebriedahkide gusnie almetjh sijhtieh årrodh.
- Dïhte fleksijbele jïh sjugniedihks vuajnoe jarkelæmman jïh orreussjedæmman akte vihkeles aarvoe saemien jielemeevtiedimmesne aaj daan biejjien. Mijjieh aktem jeereldihkie jieliemassem sïjhtebe mij lea fryöjstehke dovne nyjsenæjjide jïh gaarmanæjjide. Vihkeles hijven mieriekrïevenassh utnedh juktie juhtemestraejmiem jarkedh saemien dajvijste. Aktem jeereldihkie jieliemassem jïh barkoesijjieh noeride sjugniedidh sæjhta joekoen vihkeles årrodh jis edtja dejnie lyhkesidh, Wollmann Magga jeahta.
Dej stoerre gåhkoej gaavhtan Saepmesne dle vihkeles aktem ektie tjåanghkoesijjiem utnedh. Viermiebigkeme, daajroejuekeme, motivasjovne jïh skraejrie sijhtieh vihkeles biehkieh årrodh konferansesne. Kultuvrejielemekonferansesne akte stoerre fokuse guktie dïhte saemien kultuvrevåarome lea tsevtsiedæjjine orreme sïelteevtiedimmesne, jïh maahta govledh guktie mijjen åehpies kultuvrejielemebarkijh leah viermiem nuhtjeme juktie gaskenasjonaale aavrem åadtjodh.
- Manne vïenhtem jïjnjh hijven raerieh sijhtieh bååtedh jïh jïjnjh digkiedimmieh sjædta mah mijjem guhkiebasse vaeltieh. Manne aaj veanhtedem krïevenassh Saemiedægkan bïejesuvvieh guktie mijjieh maehtebe dåarjedidh, jïh guktie mijjieh maehtebe buerebe sjïdtedh kultuvrejielemesuerkesne, Wollmann Magga jeahta.
Saemiedigkie Sápmi Næringshagine laavenjostoe öörnedimmien bïjre konferanseste. Minngemosth sïjsebïeljelimmiemierie konferansese lea njoktjen 2.b., men lihtiesåbpoe jis sïjsebïeljelh goevten 22.b. åvtelen.
Govlehtallijh:
Saemiedigkieraerie Mariann Wollmann Magga, mob. 977 02 350
Katarina Påve-Gaup, Sápmi Næringshage, mob. 480 51 672
Kirsten Østby, Saemiedigkie, tell. 78 47 41 08