Gusnie Maahtoelutnjeme - Saemien faamoem åtna?
Gaajhkh learohkh saemien skuvline edtjieh lïerehtimmiem åadtjodh Learoesoejkesjevierhkien mietie Maahtoelutnjeme - Saemien. Gaajhkh maadthskuvlh saemien gïelen reeremedajvesne (saemien tjïelth), leah tjïelkestamme goh saemien skuvlh. Doh göökte staateles jåarhkeskuvlh Saemien jåarhkeskuvle jïh båatsoeskuvle Guovdageaidnusne jïh Saemien jåarhkeskuvle Karasjohkesne aaj dïedtem utnieh lïerehtimmiem vedtedh dan saemien learoesoejkesjevierhkien mietie. Learohkh reeremedajven ålkolen, mah saemien gïelelïerehtimmiem jïh lïerehtimmiem saemien gïelesne utnieh, edtjieh aaj lïerehtimmiem åadtjodh Maahtoelutnjemen - Saemien mietie, v. ööhpehtimmielaakine § 6-2, voestes lïhtse jïh mieriedimmie ööhpehtimmielaakese § 1-1b) jïh 1-1c).
Learoesoejkesjh faagesne saemien faamoem utnieh lïerehtæmman faagesne saemien dovne saemien gïelen reeremedajven sisnie jïh ålkolen.
Learoesoejkesjevierhkie Maahtoelutnjeme - Saemien daejtie bielide åtna:
- Sïejhme bielie
- Prinsihph lïerehtæmman - saemien
- Learoesoejkesjh faagese saemien
- Saemien parallelle seammavyörtegs learoesoejkesjh
- Saemien learoesoejkesjh jåarhkeprogrammefaagide
Dejnie faagine gusnei jïjtsh saemien parallelle learoesoejkesjh leah dorjesovveme, doh sïejhme learoesoejkesjh Maahtoelutnjiemisnie faamoem utnieh, aaj dejtie learoehkidie mah saemien skuvlesne vaedtsieh.
Learoesoejkesjh mah faamoem utnieh daelie leah daesnie: http://www.udir.no/Lareplaner/Finn-lareplan/Kunnskapsloftet-samisk/
Learoesoejkesjh faagesne saemien aaj gaavnh Saemiedigkien nedtesærjosne.
VÏHTESJH! Jaepien 2006 akte gærjetje bööti nommine Læreplanverket for Kunnskapsløftet - samisk. Doh jeanatjommes learoesoejkesjh leah staeriedamme 2006 mænngan jïh learoesoejkesjh daennie gærjatjisnie eah leah faamosne vielie.