Sametingetsrådets forslag til budsjett 2013_norsk.pdf 1.010,78 kB
Kultuvre, gïele jïh gaskenasjovnaale barkoe lea vihkeles skreerjemesuerkieh Saemiedigkieraerien uvtelassesne budsjedtese jaapan 2013. – Saemien institusjovnh jïh festivaalh leah tjoevketjoelth jïh vihkeles sijjieh kultuvre-, gïele- jïh identiteeteevtiedimmien gaavhtan, raerielïhtsege Vibeke Larsen jeahta.
Saemien kultuvreinstitusjovnh leah vihkeles gosse edtja dam saemien byögkelesvoetem tseegkedh, saemien kultuvrem guarkedh jïh pruvvieh bïgkedh kultuvri gaskem. Daah institusjovnh leah aaj vihkeles saemien kultuvrebarkoesijjieh, gusnie saemien gïele lea jarngesne.
-Saemiedigkieraerie jåarhka saemien kultuvreinstitusjovnh eevtjedh, jïh manne tuhtjem sjollehke mijjieh raeriestibie golme festivaalh meatan vaeltedh Saemiedigkien budsjedtesne, raerielïhtsege Vibeke Larsen jeahta. Daate edtja viehkiehtidh daajroem sjugnedidh dan båetijen biejjien jïh evtiedimmien bïjre, Larsen jeahta.
Julevsaemien våhkoe öörnesåvva Divtasvuodnesne fïerhten jaepien, gusnie julevsaemien gïele jïh noerh leah jarngesne. Raasten Rastah – åarjelsaemien kultuvrefestivaale öörnesåvva Röörosesne fïerhten mubpien jaepien, jïh lea akte raasten rastah festivaale gusnie maanah jïh göele lea jarngesne. Raereste aaj saemien våhkoem Tromsøsne meatan vaeltedh Saemiedigkien budsjedtesne.
Saemiedigkie jïh Norsk folkemuseum leah latjkoem dorjeme bååstedesertiesimmien bïjre kultuvreaerpeste dejtie saemien museumidie. Saemiedigkieraerie latjkoem tjïrrehte jïh
1 mill. kråvnah lyjke ryöjreden prosesside bååstedesertiestimmieprosjekten sjïekenisnie, man nomme Bååstede.
Vibeke Larsen + 47 941 30 116
Saemien gïelekampanje
-2013 lea nasjovnaale gïelejaepie, jïh dellie joekoen sjollehke bæjhkoehtidh saemiedigkieraerie dåarjoem raereste göökte orre saemien gïelejarngide budsjedtesne. Storfjord gïelejarnge Storfjordesne jïh Gïeleaernie Raavrevijhkesne, raerielïhtsege Vibeke Larsen jeahta.
Saemiedigkieraerie aaj gïelejarngide goltele mah sijhtieh vielie daajroes mierieh utnedh åvtese, jïh raereste akte evtiedimmiedåarjoe tseegkesåvva dejtie saemien gïelejarngide mah dåarjoem Saemiedigkeste åadtjoeh.
-Aaj joekoen sjollehke Raavrevijhken tjïelte saahtan meatan sjædta saemien gïelen reeremedajvesne, jïh dan åvteste guektiengïeledåarjoem Saemiedigkeste åådtje. Daate sæjhta viehkiehtidh giïlem eevtjedh aktene dajvesne gusnie gïele håvhtadamme, Larsen jeahta.
Saemiedigkien åejvieulmie saemien gïelebarkojne lea jienebh gïeleutnijh jïh vielie åtnoe saemien gïeleste. Gïelejaepien 2013 sjïekenisnie saemiedigkieraerie dannasinie aktem gïelekampanjem raereste juktie skreejredh vielie saemien åtnasåvva, jih jienebh dåårrehtidh mah sijhtieh gïelem lieredh.