- Paehpierisnie hijven vååjnoe, men rïektesisnie akte giehpiedimmie. Dåarjoeh eah baalhka- jïh åasalissiehtimmiem Nöörjesne gaptjh, jïh daate joekoen håjnoes. Daate aaj gyhtjelassem vadta mejtie Saemiedigkie buektehte dam barkoem gorredidh maam daelie dorjebe. Joekoen Tjïelte- jïh orrestimmiedepartemeente (TOD) dïhte, mij dejnie aktine gïetine vadta men mubpine vaalta, raerielïhtsege Henrik Olsen jeahta, mij dïedtem åtna budsjedten åvteste saemiedigkieraeresne.
Dïhte vuesehte tjïelteministere aktem lissiehtimmiem dåajvohte 15,5 millijovni raajan, seamma tïjjen goh dåarjojde giehpiedieh 10 millijovnigujmie gosse vierhtieh bååstede giesieh mejtie aarebi dåarjoejin Stoltenberg II Kultuvrelutnjemen tjïrrh.
- Læjhkan sjollehke gïele, maanagïerte jïh learoevierhtieh vielie vierhtieh åadtjoeh budsjedtesne. Men dah båetieh goh mïerhkeldh vierhtieh, jïh daate vihth sæjhta jiehtedh Saemiedigkie ånnetji ånnetji vaenebe frijjevoetem åådtje jïh vaenebe reaktam jïjtje nænnoestidh, Olsen jeahta
Saemiedigkien lin stoerre veanhtadimmieh Saemien Sijte jïh Beaivváš edtjin meatan årrodh daennie budsjedtene, jïh lea joekoen håjnoes ihke idtji numhtie sjïdth.
- Daate vuesehte reerenasse onne væljoem åtna dejtie saemien kultuvregåetide saetniedehtedh, jïh mijjieh tjoerebe Stoerredigkiem skreejrehtidh eadtjohke årrodh daesnie, Olsen jeahta. .
Saemiedigkieraerie sæjhta aaj guhkiebasse barkedh Stoerredigkine ektine dåarjoej bïjre juktie barkoem aelkedh saetniesvoetekommisjovnine.
Båatsoen gaavhtan dle dïhte raeriestamme lissiemaaksoelutniestimmie juktie gïehtelimsvierhtieh åestedh sæjhta dïenestem nænnoestehtedh.
- Jalhts daate ij leah akte bielie Saemiedigkien budsjedteste dellie daate joekoen hijven gaajhkide båatsoesaemide jïh jieliemasse, Olsen jeahta..
Jis vielie bïevnesh sïjhth gaskesadth saemiedigkieraeriem, tell. 907 75 219