Dej gaskem mah dåarjoem åådtjeme lea Stiftelsen Saemien musihkefestivaale Guovdageaidnusne mij 200 000 kråvnah dåarjojne åådtjeme juktie åssjalommesem guhkiebasse evtiedidh orresistie sjïehtedimmien bïjre båarasåbpoe Sámi Grand Prix-laavloemijstie.
Henrik Olsen (Foto: Kenneth Hætta)
Stiftelsen Saemien musihkefestivaale dam darjoeji 2019 gosse lij 30 jaepieh mænngan Sámi Grand Prix öörnesovvi dan ellen voestes aejkien. Åssjalommese lea noere artisth jïh produsenth edtjieh båeries klassihkerh orresistie sïjse spealadidh jïh dej lin dovne bæjhkoehtimmieh jïh konserth gusnie daejtie orre laavloemidie laavloejin. SMF daelie nuepiem vuajna daam konseptem evtiedidh, dovne dejnie aajkojne orre, noere artisth jïh produsenth åvtese lutnjedh, men aaj juktie jeatjah saemien festivaaligujmie laavenjostedh – daan aejkien Márkomeannu.
– Daate akte joekoen gieltegs prosjekte mij sæjhta meatan årrodh dovne Saemien musihkefestivaalem jïh Márkomeannum evtiedidh, dan åvteste dah leah meatan goh laavenjostoeguejmieh prosjektesne. Lissine sæjhta meatan årrodh vueliem åvtese lutnjedh jieniebinie scenine, dan åvteste laavenjostoe aaj tseegkesovveme gaskem jeatjah Riksscenine, saemiedigkieraerie Henrik Olsen (NSR) jeahta.
Jaepien 2020 Stiftelsen Saemien musihkefestivaale edtja lissine jarngesne utnedh minngeles produseenth dåårrehtidh jïh edtja barkoetjåanghkoej tjïrrh jïh mentovrigujmie jienebh musihkeproduseenth Saepmesne evtiedidh.
– Gosse jarngesne åtna jienebh musihkeproduseenth jïh joekoen minngeles produseenth, dellie daate lea prosjekte mij lissine sæjhta meatan årrodh saemien artiste- jïh tjeahpoebyjresem evtiedidh abpe Saepmesne. Daate hijvenlaakan vuesehte guktie mijjieh maaje vuejnebe mijjen saemien institusjovnh leah meatan maahtoem lissiehtidh aaj jïjtsh institusjovnen ålkolen.
Dåarjoe bæjhkoehtæmman saemien lidteratuvreste
Saemiedigkieraerie aaj dåarjoem vadteme juktie saemien lidteratuvrem bæjhkoehtidh. Dej gaskem mah dåarjoem åådtjeme lea Solum Forlag AS mij 331 000 kråvnah åådtjeme juktie Kathrine Nedrejorden romaanem «Det Sara skjuler» jarkoestidh.
– Kathrine Nedrejord lea tjaelije mij gellie teemah bæjjese vaeltieh mej bïjre geerve soptsestidh. Daennie noereromaanesne teemah leah seksuelle daaresjimmie jïh daaresjimmie mah feesten mænngan heannadieh, jïh dahkoe Karasjohkesne sjugniehtåvva. Gærja joe hijven laejhtemh åådtjeme jïh mijjieh gegkiestibie dïhte sæjhta vielie digkiedimmieh teeman bïjre buektedh gosse aaj noerhtesaemien gielesne båata, Olsen jeahta.
Mubpie ohtsememierie dåarjoeöörnegasse produksjovnese saemien lidteratuvreste lea njoktjen 1.b. 2020. Dåarjoeöörnege kultuvreråajvarimmide ræhpas ohtsememieriem åtna.
Jis dov leah gyhtjelassh jïh/jallh gihtjehtimmiem sïjhth, gaskesadth saemiedigkieraeriem Henrik Olsen (NSR), tell. +47 907 75 219