Stoerredigkien gïehtjedimmie- jïh konstitusjovnemoenehtse sjæjsjali dæjstan voerhtjen 25.b. 2017 aktem ræhpas govlehtimmiem hööltedh akten saetniesvoetekommisjovnen bïjre saemien jïh kveenen årroejidie Nöörjesne.
– Saemiedigkie lea krïeveme akte barkoe saetniesvoetekommisjovnine nearhka mij konsekvenside vuesehte dehtie guhkies assimileradimmiepolitihkeste staaten bieleste, mij gïengeles gïejh saemien årroji luvnie laahpeme. Tjuara aktem tjïelkestamme tsiehkiem akten lïhke nasjonaale histovrijen bïjre åadtjodh, man åvteste dïedtelgimmie jïh daaresjimmie dorjesovvin saemien åålmegen vööste. Akte ræhpas govlehtimmie sæjhta våajnoes darjodh man åvteste daerpies dagkarinie goerehtimmine, jïh manne madtjeles ihke moenehtse lea sïemes, saemiedigkiepresidente Vibeke Larsen jeahta.
Digkiedimmie daaroedehtemekraanskomen bïjre Stoerredigkesne
Gïehtjedimmie- jïh konstitusjovnemoenehtse lea sjæjsjalamme aktem ræhpas govlehtimmiem hööltedh, gåabph sjyöhtehke årganisasjovnh jïh institusjovnh maehtieh sijjen ïedtjem bïeljelidh lahtestidh. Moenehtse sæjhta lissine sov raeriestimmine båetedh aamhtesasse jïh digkiedimmie sjædta Stoerredigkien stoerretjåanghkosne akten saetniesvoetekommisjovnen bïjre åvtelen ruffien 21.b. daan jaepien, moenehtsen tjaelije Thomas Dam vihteste Saemiedægkan.
Våarome sjæjsjalæmman lea tjirkijeraeriestimmie 8:30 S (2016-2017) stoerredigkietjirkijijstie Kirsti Bergstø jïh Torgeir Knag Fylkesnes, mah leah raeriestamme Stoerredigkie aktem kraanskomekommisjovnem nammohte, mij edtja saetniesvoetekommisjovnine årrodh daaroedehtemepolitihkese jïh ovreaktese maam saemien jïh kveenen åålmegi vööste Nöörjesne dorjeme.
– Manne sïemes dejgujmie mah raeriestimmiem buakteme mah tjïertestieh Stoerredigkie dïhte mij dïedtem guadta Nöörjen åvteste, mij byöroe skraejriem vaeltedh dagkeres kraanskomekommisjovnese. Dah tjuerieh dïedtem vaeltedh dan bielien åvteste nöörjen histovrijistie mij lij dïedtelgimmien bïjre saemijste jïh kveenijste. Dellie sïjhtebe aaj vaestiedassem gaavnedh guktie maahta saejride dejpelistie davvodh, saemiedigkiepresidente Vibeke Larsen jeahta.
Fylhkendigkieh Tromsesne, Nordlaantesne, Noerhte-Trööndelagesne jïh Åarjel-Trööndelagesne leah daelieh dåarjoelahtestimmieh vadteme Saemiedægkan nïerhkemen bïjre saetniesvoetekommisjovneste. Saemien gærhkoeraerie lea aaj dåarjoem vadteme juktie dagkeres kommisjovnem tseegkedh.
– Daate aktem gamte politihkeles dåarjoem vuesehte mijjen krïevenassese akten kraanskomekommisjovnen bïjre, naakede maam manne gegkestem aaj Stoerredigkie måjhtele daennie prosessesne guhkiebasse, Vibeke Larsen minngemosth jeahta.
Dastegh gihtjehtimmie, gaskesadth saemiedigkiepresidentem Vibeke Larsen tlf: 941 30 116
Lohkh abpe tjirkijeraeriestimmiem daesnie.