Minngemes stoerredigkiebïevnese båatsoen bïjre bööti 1992. Daan biejjien laanteburrie- jïh beapmoeministere Jon Georg Dale dam orre stoerredigkiebïevnesem monnehkevoeten bïjre båatsosne åehpiedehti.
–Daate lij akte nuepie reerenassese aktem båatsoepolitihkem staeriedidh mij guhkiem båajhtode orreme. Sijjeste vuejnebe annje lea åejvieladtji gïehtjedimmie- jïh stuvrehtimmiedaerpiesvoete mij våaroemasse bïejesåvva politihkeevtiedæmman, Magga jeahta.
Saemiedigkie lea guhkiem tjïertestamme båatsoen sijjie goh akte vihkeles saemien kultuvreguedtije tjuara aalkoevåaroeminie årrodh gosse edtja båatsoepolitihkem hammoedidh. Gellie dotkijh saemien båatsoen sisnjelen leah tjïertestamme akte sïejhme bielie nöörjen båatsoereeremisnie guhkiem, lea faatoes goerkese orreme aarvoevåaromen, saemien gïehtelimsvuekiej jïh daajroevåaromen bïjre.
–Vååjnoe goh reerenasse stööremes ïedtjem åtna fïerhtem smaave bieliem saemien båatsosne stuvrehtidh. Jielemeevtiedimmie jïh råajvarimmieh båatsoesaemide eah leah seamma vihkeles. Gosse vihkielommes dïjre reerenasseste lea bovtsetaalem gïehtjedidh viehkine elektrovneles chipsijste, jïh laakevihtiestamme reaktam åadtjodh bovtsetaalem bæjhkoehtidh, dle syjhtedassedaltese amma ovmurreds, Magga vihteste.
Saemiedigkie aaj joekoen njåajjan reerenassen vuelege syjhtedassedaltesistie juktie båatsoen areaalevåaromem gorredidh. Båatsoe goh akte eatnemebaseradamme jieleme lea jearohke gåatomedajvijste jis edtja aktem båetijem aejkiem utnedh.
–Båatsoen stööremes haesteme lea areaalevåaromem gorredidh. Dïhte stööremes aajhtoe båatsoen monnehkevoeten vööste lea dïhte ahkedh stuerebe nuhteme areaalijste, goh dovne bigkeme jïh lissiehtamme feeleme, Magga tjïerteste.
–Manne vïenhtem doh råajvarimmieh ektiedamme areaalereeremasse mejtie reerenasse daelie buakta, eah leah nuekies juktie aktem båetijen aejkien, jielije båatsoem gorredidh. Reerenassen faatoes råajvarimmielastoe juktie båatsoen gåatomevåaromem gorredidh lea tjarke kontrastesne dan juhtije prosessese bovtsetaalegiehpiedimmine, Magga vihteste.
Reerenasse bïeljele daelie sæjhta ekologeles monnehkevoetem prioriteradidh båatsoelaaken åssjeleparagraafesne. Saemiedigkie meala akte dagkeres prioriteradimmie nænnoes fokusem tsihkestahta juktie areaalide gorredidh jïh juvreteehpemidie giehpiedidh, jïh ij akte aktelaaketje fokuse bovtsetaalese.
- Akte tjarke tjïertestimmie ektiedimmeste dan ekologeles, ekonomeles jïh kultuvrelle monnehkevoeten gaskem lij sïjhteme aktem eevre jeatjah fokusem vedtedh aktene dan vihkeles tjaatsegisnie, jïh akte gorredimmie båatsoste goh aalkoealmetjejieleme, Mariann Wollmann Magga minngemosth jeahta, mij jeahta lea joekoen hijven Nöörjen Båatsoesaemiej Rijhkesiebrie jïh Saemiedigkie departemeentine ektine edtjieh monnehkevoeteulmide veelebe vuartasjidh.
Govlehtallije, saemiedigkieraerie Mariann Wollmann Magga, tlf. 977 02 350.