Nordlaanten åålmegemiehtjiejarnge, Guessiejarnge åålmegemiehtjie Nordlaante jïh Adde Zetterquist tjeahpoegallerije bievnemem saemien histovrijistie jïh kultuvreste utnieh goh vihkeles bielie sijjen barkoste. Daelie sijhtieh aktem guhkiebasse barkoem eevtjedh viehkine nænnoes jïh ihkuve scene- jïh bievnemeareenam tseegkedh saemien tjeahpose, musihkese jïh lidteratuvrese. Ulmie lea saemien kultuvrem åehpiedehtedh almetjidie aktine lïhkesvoete eatnemen aarvojde dej bïjre guktie goerkese, seahkarimmie jïh ïedtje saemien histovrijasse jïh kultuvrese nænnoesåbpoe sjidtieh.
Silje Karine Muotka
– Prosjekte maahta viehkiehtidh saemien tjeahpoen jïh kultuvren bïjre vielie bievnedh jïh lissine viehkine årrodh siebriedahkedigkiedimmesne, saemiedigkieraerie Silje Karine Muotka (NSR) jeahta.
Nordlaanten åålmegemiehtjiejarnge sæjhta vihties öörnedimmieh guesside öörnedidh daan jaepien mah dejtie nuepiem vedtieh joekehts såarhts guessieh gaavnedidh. Joekoen vihkeles ïedtjem gåaskodh maanaj jïh noeri luvnie, gusnie aaj noere geerve almetjh edtjieh åadtjodh meatan årrodh Nordlaanten åålmegemiehtjiejarngem sjugniedidh goh attraktijve areena jïh gaavnedimmiesijjie.
Åålmegemiehtjiejarnge sæjhta iemie gaavnedimmiesijjiem darjodh saemide Salten-dajvesne jïh abpe Saepmesne, jïh gaskesem åtna gelliej almetjigujmie Nöörjesne, Sveerjesne jïh Såevmesne mah edtjieh viehkine årrodh. Dej lea fokuse jieniebidie sjangeridie saemien kultuvren jïh tjeahpoen sisnjeli prosjektesoejkesjisnie, jïh leah joe jienebh latjkoeh jienebi artistigujmie jïh kultuvrebarkijigujmie.
– Orre areenah juktie saemien tjeahpoen jïh kultuvren bïjre bievnedh leah vihkeles, joekoen tjiehpiedæjjide mah eah leah dan åehpies annje. Dagkeres faalenasse sæjhta meatan årrodh jienebh saemien tjiehpiedæjjah åvtese lutnjedh gelline sjangerinie, Muotka jeahta.
Mænngan dïhte saemien kultuvreprogramme 2020 lea nåhkeme åålmegemiehtjiejarnge sæjhta dååjrehtimmide vuartasjidh jïh guhkiebasse soejkesjidh maam saemien scene- jïh bievnemeareenide Nordlaanten åålmegemiehtjiejarngesne edtja faalehtidh.
Nordlaanten åålmegemiehtjiejarnge lij 160.000 kråvnaj bïjre syökeme jïh abpe summem åådtje. Dåarjoe vaaltasåvva dåarjoeöörnegistie Regijonaale evtiedimmie.
Jis dov lea gihtjehtimmie jallh gyhtjelassh, gaskesadth saemiedigkieraeriem Silje Karine Muotka (NSR), +47 984 87 576, silje.karine.muotka@samediggi.no