Jalhts saemien lea biejjieladtje gïele jeenjesidie Unjargesne, dle ahkedh behtjiedimmien nuelesne sosijaale ektiedimmine, gusnie nöörjen gïele lea dïhte jïjtjereerije. Jane Astrid Juuso lea sov barkoen tjïrrh tjïelten gïelejarngesne Isak Saba guovddáš tjarke barkeme juktie sosijaale sijjieh tseegkedh gusnie saemien gïele prioriteradamme sjædta. Daate barkoe lea dovne maanah, noerh, geerve jïh båarasåbpoe almetjh feerhmeme.
–Saemien gïeletsiehkie Unjargesne lij feagan sïjhteme dan hijven orreme jis ij lij Jane Juuson barkoen åvteste. Jane lea vyörtegs daam åasam åadtjodh, dan åvteste dovne nueriebidie jïh voeresidie tjïeltesne skreejrehtamme saemien eadtjohkelaakan nuhtjedh, saemiedigkiepresidente Vibeke Larsen jeahta.
Gïelejealajimmine barkeme
Juuso aaj faageleslaakan gïelejealajimmine barkeme studijesoejkesjen tjïrrh «Válddán giellan ruovttoluotta /Gïelem bååstede vaaltam», mij aaj daelie Saepmien sveerjen bielesne åtnasåvva.
– Jane Astrid Juuso lea dagkerh prosjekth tjïrrehtamme sov barkoen tjïrrh goh åvtehke tjïelten gïelejarngesne, men nov lea badth altese persovneles eadtjohkevoete mij lea meatan orreme gellie gïeleutnijh skreejrehtamme jïh dåårrehtamme, Larsen jeahta.
Åasa lea 50 000 kråvnah jïh akte tjeahpoediplome maam Sven Niklas Blind lea dorjeme.
Govhtede vitnije
Saemien gïeleraerie gïeleskreejremeåasam tseegki jaepien 2000. Dan mænngan Saemiedigkien gïeleståvroe jïh Saemiedigkieraerie åasam vadteme.
Aarebi vitnijh gïeleskreejremeåaseste leah Divtasvuodnan Eejhtegedåehkie jaepien 2000, Gïeledåehkie Skånlandeste 2001, Harry Solhaug Kåfjordeste 2002, Sagka Stångberg Dearneste 2009 jïh Ingo Ántte Ánte Mihkkal /Ante Mikkel Gaup 2013.
Govlehtallije, samiedigkiepresidente Vibeke Larsen, tell. +47 941 30 116.
