Båatsoesaemie Jovsset Ánte Sara Guovdageaidnuste nyöjhki nænnoestimmiem Laanteburrie- jïh beapmoedepartemeenteste goltelidh mij jaepien 2014 krïevi satne edtji sov krievviem giehpiedidh 75 bovtside. Sara aamhtesem tseegki staaten vööste jïh digkiereaktesne vitni, men staate sjæjsjalimmiem leejhti. Daan biejjien bearjadahken 17.b. dåapmoe bööti Hålogalaanten laakemaenniereakteste mij laejhtemem heajhta, jïh mij sov dåapmosne vihteste nænnoestimmie staateste lea luhpehts dan åvteste dïhte Saran reaktam mïedtele jïjtse kultuvrine barkedh.
Saemiedigkiepresidente Vibeke Larsen lea aavone Sara vitni.
– Uvtemes sïjhtem Jovsset Ánte Saram læhkoehtidh ihke laakemaenniereaktesne vitni. Doh prinsihpih mah leah våarome daan reaktasjæjsjalæmman leah akteraeresne dejnie maam Saemiedigkie lea tjïertestamme gellie jaepieh, gidtjh naemhtie guktie staate lea sjïehtesjamme bovtsetaalegiehpiedimmide dle dïhte stoerre viesjiesvoeth åtna, jïh ij leah saemiej jïjtjenænnoestimmiereaktan mietie, jïh dïhte maahta sjïere reaktah mïedtelidh, saemiedigkiepresidente Vibeke Larsen jeahta.
Saemiedigkie jeahta båatsoebïevnesisnie mij nænnoestamme sjïdti 2016, doh nænnoestimmieh forholdsligke giehpiedimmien bïjre lea båatsoetaalem lissiehtamme, jïh bielelen naan såarhts jaabneden biehkie dle joekehts gïetedimmiem jïh fer stoerre goerpedehtemh sjïdteme dan aktegs båatsoealmetjasse.
Almetjereaktide mïedtele
Hålogalaanten Laakemaenniereakta konkluderede dåapmosne Laanteburrie- jïh beapmoedepartemeenten nænnoestimmeste njoektjen 10. biejjeste 2014 bovtsetaalegiehpiedimmien bïjre, lea akte mïedtelimmie almetjereaktine. Bovtsetaalegiehpiedimmie maam staate lea soejkesjamme lea luhpehts dan åvteste dïhte Saram reaktam mïedtele sov kultuvrine barkedh EN:n konvensjovnen mietie sivijle jïh politihkeles reaktaj bïjre, artihkele 27.
Laakemaenniereakta gaskem jeatjah tjaala: «Jalhts båatsoelaaken nænnoestimmieh bovtsetaalen jïh giehpiedimmien bïjre bovtsetaaleste aktem eensi jïh objektijve buerkiestimmiem åtna båatsoelaaken åssjelen mietie, dle laakemaenniereakta våaroemasse bïejeme akte njieptjie gååvnese gåessie akte dahkoe reaktoe vååjnoe aaj staateles reguleradimmesne båatsoste, jïh njieptjie luhpehts dahkose lea mïedtelamme daej veajkoej.»
– Laakemaenniereakta aktem joekoen vihkeles tjïelkesimmiem dorjeme almetjereaktan bïjre dej ektie jïh sjïere reaktaj bïjre. Daej veajkoej dle staate Jovsset Ánte Saran almetjerïekteles vaarjelimmiem staateles dahkoej vööste mïedtelamme. Sïjhtem Saram garmerdidh ihke doesteme sov båatsoereaktan åvteste gæmhpodh, jïh dan vihkeles gæmhpoen åvteste maam vaalteme gelliej saemiej åvteste. Daate akte vihkeles prinsihpeles dåapmoe mij sæjhta hijven konsekvensh vedtedh gellide saemide, saemiedigkiepresidente Vibeke Larsen minngemosth jeahta.
Gihtjehtimmie, saemiedigkiepresidente Vibeke Larsen, tell: 941 30 116