Saemien fealadasse 2.0 akte 3-jaepien prosjekte mij stuvresåvva sïelteste NordNorsk Reiseliv. Fealadasseprosjekten aajkoe lea maahtoem jïh maarhkedem nænnoestehtedh saemien fealadassegïehtelimmide. Prosjekte edtja golme jaepieh vaesedh. Saemiedigkieraerie aktem fïerhten jaepien dåarjoem vadteme 850 000 kråvnine prosjektese.
Stuvremedåehkesne tjirkijh Saemiedigkeste, NordNorsk Reiseliv jïh akte fealadassegïehtelimmie fïerhtede daejstie golme noerhtemes fylhkijste. Stuvremedåehkien sov byögkeles aalkoebiejjiem åtna dæjstan suehpeden 2.b. 2017 Altesne. Stuvremedåehkien åvtehke lea Ellinor Guttorm Utsi, mij gellie jaepieh dååjrehtimmiem åtna fealadassejieliemistie.
Ållesth 25 ovmessie saemien fealadasseprosjekth dejstie golme noerhtemes fylhkijste mah nuepiem åadtjoeh meatan årrodh. Maahtoelutnjeme jïh profesjonaliseradimmie sijhtieh jarngesne årrodh. Daate joekoen vihkeles ihke saemien fealadasseaktöörh edtjieh buerebelaakan buektiehtidh mïerhkevaaroem Noerhte-Nöörje deelledh.
Saemiedigkieraerie Mariann Wollmann Magga meala stoerre nuepie gååvnesieh saemien fealadasseprosjekth evtiedidh, joekoen daelie gosse fealadassejieleme noerhtene bïehtsegeminie.
–Saemien kultuvre lea sjïere jïh tjaebpies. Mijjieh tjoerebe buektiehtidh destie dïenestem åadtjodh bielelen mijjieh mijjen kultuvrem biejstebe. Daate sæjhta aaj fokusinie årrodh daennie gieltegs prosjektesne.
Viermieh jïh tjåanghkoesijjieh vihkeles
Akte aarebi saemien fealadasseprosjekte vuesiehti akte tjåanghkoesijjie saemien fealadassejieliemasse lea vihkeles. Faageles digkiedimmieh, åssjaldahkh jïh åssjalommesh låtnodh jïh lahtestimmieh åadtjodh jïjtse dorjesen bïjre lin joekoen vihkeles. Sïjhtebe viermiebigkemem jïh daajroejuekemem meatan vaeltedh dan orre boelhkese prosjekteste.
–Mov mïelen mietie dle akte laavenjostoe dej saemien fealadasseaktööri gaskem eevre vihkeles ihke saemien fealadasse edtja lyhkesidh. NordNorsk Reiseliv aktem sjïeremaahtoem åtna fealadassen bïjre noerhtene jïh daate, dejnie saemien maahtojne ektine stuvremedåehkesne jïh saemien fealadassegïehtelimmine, maahta gujht hijven illedahkh vedtedh, Magga meala.
Dïhte lissehte saemien fealadassegïehtelimmieh tjuerieh veanhtadidh dah jïjtjh tjuerieh jeanatjommesem barkoste darjodh, juktie gaajh stoerre barkoe sïelteaajhterinie årrodh, men meala saemien fealadasse 2.0 sæjhta akte nænnoes dåarjoehtæjja årrodh ihke saemien fealadassejieleme lyhkese.
Jis gihtjehtimmie, gaskesadth saemiedigkieraeriem Mariann Wollmann Magga, tell. 977 02 350Jeatjah bïevnesh, gaskesadth raeriestæjjam Kirsten Østby, tell. 78 47 41 08