Laakeraeriestimmie jeenjemasth konsultasjovneprosedyride fulkie mij vihtiestamme sjïdti 2005 jïh lea akte guhkiebasse barkoe raeriestimmeste Saemiereaktamoenehtsistie, mij lij govlehtimmesne gïjrese 2009.
- Daelie libie tjïelkebe goerkesem åådtjeme guktie akte dejstie vihkielommes dïrregijstie saemiepolitihkesne edtja åtnasovvedh. Konsultasjovnenjoelkedassh gorredieh Saemiedigkie jïh jeatjah ryöktesth saemien ïedtjeladtjh mej bïjre lea, leah meatan juktie sïemesvoetem åadtjodh sjæjsjalimmiej bïjre mah leah vihkeles mijjese. Njoelkedassh leah vihkeles ihke dovne Saemiedigkie jïh jeatjah saemien ïedtjeladtjh maehtieh meatan årrodh hammoedidh jïh nænnoestidh guktie båetijen aejkien krïevenassh edtjieh årrodh saemien gïelese, kultuvrese, jieliemidie jïh siebriedahkejieliedasse, saemiedigkiepresidente Aili Keskitalo jeahta.
Tjïelti jïh fylhkentjïelti konsultasjovnedïedte vïedteldihkie sjædta laakesne naemhtie guktie sijjie vadtasåvva konsultasjovnedïedtem joekehtslaakan gorredidh, dejnie daajrojne dan stoerre joekehtsen bïjre tjïelti gaskem gosse lea stoeredahken jïh maahtoen bïjre jïh guktie saemien ïedtjeladtjh leah meatan.
- Gosse tjïelti jïh fylhkentjïelti konsultasjovnedïedte vïedteldihkie sjædta laakine, dellie aaj våarome nænnoesåbpoe sjædta akten laavenjostose gaskem saemien ïedtjeladtjh, tjïelth jïh fylhkentjïelth. Laake sjïehteladta ihke daate konsultasjovnedïedte maahta joekehtslaakan gorresovvedh jïh manne dan åvteste hijven prosesside dan bïjre aavodem dan buaratjommesasse akten voenges, regijovnaale jïh saemien siebriedahkeevtiedimmien gaavhtan, Keskitalo jeahta.
Daelie saemiedigkieraerie raeriestimmiem Saemiedigkien stoerretjåanghkose buakta juktie jååhkesjimmiem gïetedidh, åvtelen reerenasse proposisjovnem buakta Stoerredægkan.
Vielie bïevnesh, gaskesadth saemiedigkiepresidentem Aili Keskitalo, tlf. 971 29 305