Daelie Saemiedigkien leah 8 kontovresijjieh Varangerbotneste noerhtene Snåasese åarjene. Gïjren 2020 Saemiedigkie göökte bievnijebarkoeh bæjhkohte mah edtjieh eadtjohkelaakan bïhkedimmine jïh bievnieminie saemien lidteratuvreste barkedh. Dïhte akte barkoe bïejesåvva Árran julevsaemien jarngese Hábmerisnie, gusnie Saemiedigkien joe lea kontovresijjie, mearan dïhte mubpie barkoe bïejesåvva saemien kultuvre- jïh evtiedimmiejarngese Sijti Jarnge Aarbortesne.
Saemiedigkie direktööre Rune Fjellheim
– Joekoen sjollehke mijjieh daejnie bievnijebarkojne Aarbortesne mijjen lïhkesvoetem nænnoestibie åarjelsaemien gïeledajvesne. Mijjieh geerjene ihke Sijti Jarnge lea Saemiedigkiem buerie båeteme vaajtelamme sov jarngese. Mijjieh utnebe hijven Saemiedigkie sæjhta maehtedh meatan årrodh aktene lïhkebe laavenjostosne saemien aktöörigujmie Aarbortesne jïh byjreskisnie, direktööre Rune Fjellheim Saemiedigkesne jeahta.
Daajroem saemien lidteratuvren bïjre geerjehtidh
Doh orre tseegkeme bievnijebarkoeh edtjieh eadtjohkelaakan bïhkedimmine jïh bievnieminie saemien lidteratuvreste barkedh, gusnie barkoe edtja årrodh daajroem geerjehtidh saemien lidteratuvren jïh kultuvren bïjre gærjagåetide, maanagiertide, skuvlide jïh mubpide fïereguhtene åarjel- jïh julevsaemien dajvesne, stoerretjåanghkoen nænnoestimmien mietie “Bievneme saemien lidteratuvreste” skïereden 2018.
Saemiedigkie sæjhta daejtie göökte barkojde beagkoehtidh daan gïjren.
– Daate göökte gieltegs barkoeh mejtie jïjtjeraarehke jïh faepeles almetjh ohtsedibie giej stoerre ïedtje saemien lidteratuvrese jïh buelije sjaavnjoe dan bïjre bievnedh. Mijjieh aavoedibie bååstede båetedh Aarportese juktie mijjen orre kontovresijjiem byjjeslaakan rïhpestidh seamma tïjjen goh mijjen orre meatanbarkijem dåastobe, saemiedigkiedirektööre jeahta.
Saemiedigkien reereme Sijti Jarngem vaaksjoeji daan våhkoen gusnie gaskem jeatjah kontovrelokaalide vuartasjin jïh barkoem åvtese digkiedin. Nuepie aaj gååvnese jeatjah barkoeh Saemiedigkien reeremisnie maehtieh Aarbortese bïejesovvedh jis kontovresijjie gååvnese jarngesne.
Vielie bïevnesh: Direktööre Rune Fjellheim, tlf: 910 09 320, rune.fjellheim@samediggi.no
Sijti Jarnge - Samisk kultur- og utviklingssenter