Medtie 7,5 millijovnh kråvnah leah ovmessie jielemeprosjektide dåårjeme. Saemiedigkieraerie Mariann Wollmann Magga soptseste göölemejieleme lea aktene hijven evtiedimmesne jïh gellie ohtsemh båetieh dovne finansieradimmiedåarjoen bïjre göölemevïnhtside jïh tseegkemasse jïh evtiedæmman laante/dåastovetseegkeldahkijste.
–Saemiedigkie akte vihkeles aktööre åtnoen tjïrrh viehkievierhtijste juktie fryöjstehke göölemejielemem evtiedidh mij dïenestem vadta saemien mearoegaedtie- jïh fjovledajvine, Magga jeahta.
Sjïehteladta deallahtimmienuepide
Magga soptseste dah leah joekoen stoerre beetnehveahkah dåårjeme laantetseegkeldahkide guelide dan minngemes boelhken, abpe vïjhte tseegkeldahkh leah tjåanghkan 1.666.000 kråvnah åådtjeme. Dah tseegkeldahkh leah sijjine Stoerekorsnes, Nervei, Skarsvåg, Sjursjok jïh Nordvågen.
– Vihkeles sjïehteladtedh ihke dïhte unnemes fjovlepluahta deallahtimmienuepieh navradahkijste åtna, jïh joekoen vihkeles dam voenges dåastovestruktuvrem guhkiebasse evtiedidh jïh nænnoestehtedh juktie gorredidh gööleme jåarhka dejnie voenges mearoegaedtie- jïh fjovlesiebriedahkine. Voenges deallahtimmienuepieh dan unnemes pluahtese lea akte krïevenasse juktie årromem jïh fasseldimmiem mearoesaemien dajvine tjåadtjoehtidh, Magga jeahta.
Fealadasse vihkeles barkoesuerkie
Saemiedigkieraerie lea bijjelen 1,3 millijovnh kråvnah dåårjeme jieniebidie fealadassesïeltide mah edtjieh skåårvemidie jïh evtiedimmieråajvarimmide åtnasovvedh. Dovne Arctic Nuvsvåg AS Loppesne, Tufjord Molta & Utleie AS Måsøyesne, Vesterelvjenta AS, Koppangen brygger AS Lyngenisnie jïh Aernie AS Raanesne leah dåarjoem åådtjeme.
– Saemien fealadasse lea jearohke jeereldihkie faalenassijste. Fealadasse akte vihkeles barkoesurkie Saemiedægkan, Magga jeahta.
Tråante-låavthgåetie akte læhkoe
Saemiedigkieraerie aaj Laantesiebriem Sámiid Duodji jïh Duojáriid ealáhussearvi dåårjeme 150 000 kråvnajgujmie fïereguhtese, guktie duedtie gååvnesi heevehtimmievåhkoen Tråante 2017. Magga jeahta golme åajvoeh biejjieh sjïdti maarhnine dennie stoerre låavthgåetesne Tåarjesne Tråantesne, gusnie 32 vuasahtallijh meatan utnin dam buaratjommesem bovtsenbearkoste, duedteste jïh saemien hammoedimmeste ovmessie bielijste Saepmesne.
– Dååjrehtimmie destie lea låavthgåetie lij maahteme guektiengïerth dan guhkiem tjåadtjodh jïh guektiengïerth dan stoerre årrodh. Gaajh lyjhkedihks, Magga madtjeles jeahta.
Gellie kultuvreprosjekth dåarjoeji
Saemiedigkieraerie lea aaj dåarjoem vadteme 26 kultuvreprosjektide, mah tjåanghkan mahte 1,5 millijovnh kråvnah åådtjeme. Desnie Magga sæjhta golme nyjsenæjjah sjïere neebnedh mah dåarjoem åådtjeme.
Simone Grøtte Pedersen lea 150 000 kråvnah åådtjeme daanhtsoevuasahtallemasse Glemt, mij lea noerhtenöörjen dåaroehistovrijen bïjre jïh voestes vuasahtallemem åtna Noerhte-Nöörjen feestespïelesne. Maret Anne Sara lea 149 000 kråvnah åådtjeme prosjektese Pile o’Sápmi, mij lea akte tjeahpoevierhkie mij dorjesovvi goh akte gïrreme jïh akte symbovle staateles noerhkemeleekedimmesne bovtseste Finnmaarhkesne.
– Bente Haarstad joekoen tjiehpieslaakan dam åarjelsaemien båatsoekultuvrem vihteste. Simone Grøtte Pedersen tjerkebe jïh tjerkebe vååjnesasse båata fïerhtene daanhtsoevuesiehtimmesne. Maret Anne Sara tjeahpoem nuhtjie juktie tjoevkesem bïejedh båatsoen tsiehkien vööste, goh akte nænnoes politihkeles gïele aaj, saemiedigkieraerie Mariann Wollmann Magga jeahta.
Vuartesjh mah prosjekth mah dåarjoem åådtjeme boelhken 10.02.17 – 04.05.17 aktene sjïere tjaatsegisnie:
Dastegh gihtjehtimmie, gaskesadth saemiedigkieraeriem Mariann Wollmann Magga, mob. 977 02 350.