Saemiedigkieraerie madtjeles ihke Saemiedigkien prioriteradimmieh saemien bigkemeprosjektide leah dåarjoehtimmiem åådtjeme. Saemien Sijte lea dåarjoem åådtjeme orre gåatan jïh soejkesjh orre gåetien bïjre Beaivvas-teaterasse leah staatebudsjedtesne neebnesovveme.
Henrik Olsen (foto: Åse M.P. Pulk/Sámediggi)
Raerie aaj madtjeles juktie Nöörjen Kultuvrefoente lea 2 mill. vielie kråvnah åådtjeme juktie orre öörnegem tseegkedh jarkoestæmman saemien lidteratuvreste nöörjengïelese, jïh åehpiedehtemem saemien lidteratuvreste lissiehtidh. Daate sæjhta jiehtedh saemien tjaelijh sijhtieh vielie gærjah doekedh.
Reerenasse raereste aktem lissiehtimmiem dåarjodh 2,6 prosentine Saemiedægkan, men aerviedamme åasabæjjanimmie lea 2, 7 prosenth. Saemiedigkieraerie Henrik Olsen jeahta ij leah daerpies gïknjelidh daan raeriestimmien gaavhtan, men annje akte stoerre gåhkoe gaskem mijjen haestemh jïh dam maam åadtjobe juktie saemien siebriedahkem evtiedidh.
Mearan Nöörje ållesth aktem årrojelissiehtimmiem åtna, almetjelåhkoe saemien dajvine lea tjoedtjestamme, jïh mijjieh vuejnebe barkoesijjieh geahpanieh. Jis edtjebe dejtie saemien siebriedahkide nænnoestehtedh dellie Saemiedigkie byöroe stuerebe ekonomeles vierhtieh åadtjodh juktie haestemem dåastodh, Olsen jeahta.