Saemiedigkie ållesth luhkiegöökte dåarjoeh dåastoeji skuvlijste abpe laantesne, goh Guovdageaidnu, Màze, Deatnu, Alta, Raarvihke jïh Harstad faamoebaakoegaahtjemisnie irhkemen vööste. Gaajhkh learohkh mah saemien ööhpehtimmiem åadtjoeh skuvlesne bööresovvin meatan årrodh gaahtjemisnie tjaktjen 2016.
Doh saemien learohkh 7. daltesisnie Raarvihken skuvlesne, jïh ektiedåarjoe skuvleklaasside 9a jïh 9à Karasjohken skuvlesne leah vitnijinie veeljesovveme faamoebaakoegaahtjemistie. Juryje jeahta gaajhkh dåarjoeh lin joekoen hijven, men dah faamoebaakoeh joekehtadtin dejstie mubpijste dan åvteste dah lin inkludereden, åenehks jïh tjïelke jïh aaj hijven domtesh gåaskoejin juryjen luvnie.
Faamoebaakoeh mah vitnin lin naemhtie:
1. Haaj, voelpe
2. Edtjebe maam joem hæhtadidh?
3. Luste datnem vuejnedh
4. Jorgal gátnjaliid bohkosin - Gïknjelh föörhkedæmman jarkedh
5. Don leat aibbas buorre niego don leat –Datne eevre hijven goh leah
6. Leage leat ieš, earat leat jo váldon –Årroeh guktie leah, mubpieh leah joe vaalteme
Hijven relasjovnh bigkedh
Saemiedigkiepresidente Vibeke Larsen eadtjohkevoetem dejtie mah lin meatan gaahtjemisnie garmerde, mij aajkojne utnieh murriedimmiem skuvlesne lissiehtidh jïh irhkemen vööste barkedh.
- Viehkine fokusem bïejedh guktie mijjieh edtjebe gïemhpe sinsitnien vööste årrodh, gegkiestibie mijjieh viehkiehtamme hijven relasjovnh skuvline bigkedh, jïh learohkh aktem voerkes vuajnoem teemese åådtjeme. Doh dåarjoeh mejtie sïjse åådtjeme, hijven vuajnoeh dej saemien learohki gaskem vuesiehtieh, saemiedigkiepresidente Vibeke Larsen jeahta.
Vitnijefaamoebaakoeh daelie bannerinie trygkesuvvieh mejtie klaassh jïh skuvlh mah lin meatan edtjieh åadtjodh. Lissine vitnijh beetnegepreemijem 10.000 kråvnine juekieh.
Skuvlide viehkiehtidh heerredimmiebarkosne
Saemiedigkie lea meatan dennie nasjonaale barkosne «Guejmievoete irhkemen vööste» mij vaasa 2020 raajan. Ovmessie aktöörh jïh siebrieh leah Ööhpehtimmiedirektoraatine jïh reerenassine ektine, staateministere Erna Solbergen jïh daajroeministere Torbjørn Røe Isaksen baaktoe, aktem åeliedihks latjkoem signeradamme gusnie guejmieh edtjieh ektesne barkedh juktie maanide jïh noeride aktem hijven lïerehtimmie- jïh byjjenimmiebyjresem vedtedh.
Faamoebaakoegaahtjeme irhkemen vööste maam Saemiedigkie öörnedamme lij akte bielie daehtie barkoste.
- Mijjieh sïjhtimh daejnie gaahtjemisnie skuvlide viehkiehtidh daennie vihkeles barkosne irhkemem jïh daaresjimmieh heerredidh skuvline. Gaajhkh maanah jïh noerh leah vyörtegs aktem hijven skuvlebyjresem utnedh, Larsen jeahta.
Juryjisnie daah orreme: saemiedigkiepresidente Vibeke Larsen, mubpieåvtehke byjjenimmie-, hokse- jïh ööhpehtimmiemoenehtsisnie Lars Oddmund Sandvik, åvtehke Saemiedigkien noerepolitihkeles moenehtsisnie Ánná Káisá Partapuoli jïh learohkeraerielïhtsege Aina Madelen Aslaksen Gaup Saemien jåarhkeskuvlesne Karasjohkesne.