Learoesoejkesjh saemien gïelesne jïh sjïere saemien faagh
Saemiedigkien lea dïedte evtiedidh jïh vihtiestidh learoesoejkesjh saemien gïeline maadthskuvlese jïh jåarhkelïerehtæmman, jïh sjïere saemien faagide jåarhkelïerehtæmman (duedtie-, båatsoefaage jv), v. ööhpehtimmielaakine § 6-4, mubpie lïhtse.
Saemien sisvege sïejhme learoesoejkesjinie Maahtoelutnjemisnie
Ööhpehtimmielaake stillemem vadta gaajhkh learohkh Nöörjesne edtjieh lïerehtimmiem åadtjodh saemiej, dej gïeli jïh siebriedahkejieleden bïjre ektiedamme dejtie ovmessei faagesuerkide. Dej mieriej sisnjeli mejtie departemeente lea vihtiestamme, Saemiedigkien lea faamoe mieriedimmieh vedtedh sisvegen bïjre dagkeres lïerehtimmesne, v. Ööhpehtimmielaakine § 6-4, voestes lïhtse. Maahtoedepartemeente gaajhkh learoesoejkesjh vïhteste bielelen learoesoejkesjh saemien gïelesne jïh sjïere saemien faagine. Saemiedigkie læjhkan faamoem åtna saemien sisvegem vihtiestidh gaajhkine learoesoejkesjinie.
Saemien parallelle learoesoejkesjh saemien learoesoejkesjevierhkesne.
Gaajhkh maadthskuvlelearohkh tjïeltine mah leah saemien gïelen reeremedajvesne, jïh learohkh mah jeatjah gaavhtan saemien lïerehtimmiem åadtjodh maadthskuvlesne jïh jåarhkeskuvlesne edtjieh lïerehtimmiem åadtjodh gusnie prinsihph lïerehtæmman - saemien lea våarome jïh saemien parallelle seammavyörtegs learoesoejkesji mietie dejnie faagine gusnie parallelle learoesoejkesjh gååvnesieh. Saemiedigkie edtja rååresjimmesne departemeentine ektine raeriestimmiem darjodh parallelle, seammavyörtegs learoesoejkesjidie, v. ööhpehtimmielaakine § 6-4, gåalmede lïhtse. Saemiedigkie dam saemien sisvegem jïh departemeente dam jeatjah sisvegem vihtiestieh daejnie learoesoejkesjinie.