Gåvvå: Åse Pulk, Sámediggi
Pollisen reektehtsen mænngan dle nasjonaale åejvieladtjh, saemien siebriedahke, fylhkendaltese, voenges siebriedahke jïh aktegsalmetjh daerpies aktöörh gosse edtjieh akten siebriedahken åvteste barkedh bielelen daresjimmieh. Saemiedigkie sæjhta voenges siebriedahkine ektine hoksedh hijven råajvarimmieh sjïehteladtedh.
Saemiedigkie lea eajhnadovveme aktem eadtjohke råållam utnedh dennie guhkiebasse barkosne Divtasvuodna-aamhtesistie. Dan åvteste edtjebe DSJ- Doajmma Siebrre Julevsábmem jïh Árran julevsaemien jarngem gaavnedidh goeven 13. b. Mijjieh lahtesh sïjhtebe guktie mijjieh ektesne maehtebe råajvarimmieh hammoedidh mah sijhtieh nåhtojne årrodh Divtasvuodnesne. Dallatjinie libie 150 000 kråvnah vadteme akten dåarjoekonsertese mij fokusem beaja garmeresvoetese. Mijjieh gegkiestibie mijjieh hijven illedahkh åadtjobe bïjre jarkan jïh Saemiedigkie daam åtna goh akte vihkeles dåarjoe, saemiedigkieraerie Mikkel Eskil Mikkelsen jeahta.
Guhkiebasse barkoe Divtasvuodna-aamhtesistie tjuara sjugniehtovvedh gellene lehkesne
Saemiedigkieraerie sæjhta kraanskomem krïevedh byögkeles viehkieabparaateste, maanavaarjelimmeste jïh polliseste dennie tjåanghkosne maam edtjieh utnedh Tjïelte- jïh orrestimmiedepartemeentine mubpien våhkoen. Raerie veanhta histovrijh sijhtieh siebriedahkese aktem tjïelke guvviem vedtedh gaajhkesh mijjieh aktem barkoem utnebe darjodh, jïh barkoe tjuara dorjesovvedh gaajhkine daltesinie.
– Tjoerebe aktem ållesth perspektijven utnedh dennie guhkiebasse barkosne Divtasvuodna-aamhtesisnie. Gosse aamhtesem lutnjebe departemeentese sïjhtebe tjïertestidh guktie aamhtese lea daelie, dellie gellie gyhtjelassh mah eah leah vaestiedassem åådtjeme. Gyhtjelassh goh guktie daate tsiehkie meehti dan stoerre sjïdtedh åvtelen gïetesovvi, jïh guktie byögkeles instaansh systematihkeles eah leah sijjen barkoem dorjeme juktie daaresjimmie-aamhtesh bæjjese fulkedh, Mikkelsen jeahta.
Árranem gæjhta
Saemiedigkie lea aarebi Árran julevsaemien jarngen barkoem dåårjeme doh teemah bæjjese lutnjedh mah leah taabuvinie orreme. Saemiedigkieraerie Mikkelsen tjïerteste man vihkeles barkoem Árran lea dorjeme dej minngemes jaepiej.
– Saemien siebriedahkeinstitusjovnh aktem dïedtem utnieh suerkieh bæjjese lutnjedh jïh tjïertestidh siebriedahkesne mejtie tjuara tjoevkesem bïejedh. Dah edtjieh siebriedahkesjyöhtehke haestemh bæjjese lutnjedh saemien siebriedahkesne jïh Árran lea daam barkoem itjmieslaakan vaalteme jïh raaktan dejnie lyhkesamme. Saemiedigkie lea gijhteles daan barkoen åvteste. Mijjieh vïenhtebe daate lea akte dejstie fåantojste orreme ihke doh soptsesh seksuelle daaresjimmiej bïjre leah jæjhteme. Árran edtja garmerdimmiem utnedh dan barkoen åvteste, Mikkelsen jeahta.