Nuuk Arctic Declaration on the World Conference on Indigenous Peoples 2014.doc 47,00 kB
Saemiej jïh inuihth seamadin tjåenghkies ulmiej bïjre EN’en veartenekonferansen vööste aalkoealmetji bïjre 2014, dejnie tjåenghkies tjåanghkosne Nuuk’sne rïhkeden 23. – 24. b. 2012. Saemieh jïh inuihth leah dïhte Arktiske regijovne EN’en ektiedimmesne.
Saemijste tjïrkijh böötin Saemien parlamentarihkeles raereste jïh Saemieraereste, mearan inuihtijste tjïrkijh Kruanalaanten jïjtjeståvroste jïh Inuit Circumpolar Council’ste (ICC) böötin.
Presidente jïh Saemien parlamentarihkeles raerien åvtehke Egil Olli jeahta satne lea joekoen madtjeles dejnie hijven laavenjostojne inuihti jïh saemiej gaskem.
- Tjåanghkoem lyjhkedelaakan tjïrrehtin jïh hijven aajmosne. Dïhte tjåenghkies arktiske bæjhkoehtimmie lea evtiesovveme aktene lïhke laavenjostosne saemiej jïh inuihti gaskem, jïh bæjhkoehtimmien sisvege tjïelkelaakan vuesehte man vihkeles aalkoealmetji reaktah leah, naemhtie dah leah nænnoestamme g.j EN’en aalkoealmetjebæjhkoehtimmesne jaepien 2007, Egil Olli jeahta.
Saemieh jïh inuihth vuartoeh buektieh bæjhkoehtimmesne mah råajvarimmieh jïh prijoriteeth veartenekonferanse byöroe nænnoestidh jis edtja aktem nænnoesåboe tjïrrehtimmiem tjïrkedh aalkoealmetji almetjereaktijste.
- Mijjen tjåenghkies posisjovne lea dahkoej vööste stuvreme, jïh desnie orre ussjedamme raeriestimmieh mejstie aalkoealmetjh abpe veartenisnie sijhtieh aevhkiem utnedh, jis dejgujmie vijriesåbpoe barka veartenekonferansesne. Manne vïenhtem mijjen tjåenghkies bæjhkoehtimmie lea akte hijven raerie dennie barkosne veartenekonferansen vööste aalkoealmetji bïjre 2014, Egil Olli vihth tjïerteste.
Egil Olli minngedsgeatjan tjïerteste Saemien parlamentarihkeles raerie lea joekoen madtjeles dejnie arktiske dajven galhkuvetjaatseginie, gusnie dajven prijoriteeth veartenekonferansen vööste. Bæjhkoehtimmie teemah bæjjese vaalta goh aalkoealmetji jïjtjenænnoestimmiereakta, reakta eatnamasse, tjaatsan, vierhtide jïh aerpievuekien jieledevuekide.
- Bæjhkoehtimmie raeriestimmieh akten lissieprotokollen bïjre buakta EN’en aalkoealmetjebæjhkoehtæmman, juktie tjïrrehtimmiem aalkoealmetjereaktijste nænnoestidh; kultuvre, gïele, ööhpehtimmie jïh healsoe; aalkoealmetji raastendåaresth reaktah, jïh raeriestimmie råajvarimmiej bïjre juktie EN’en barkoem nænnoestidh aalkoealmetjereaktajgujmie, Olli minngemosth jeahta.
Govlehtallije:
Presidente jïh Saemien parlamentarihkeles raerien åvtehke, Egil Olli. Tell. 900 26 880