Ida Marie Bransfjell barkoem åådtjeme goh prosjekten åvtehke jïh Kjell M. Deraas goh programmen åvtehke saemieheevehtæmman 2017.
100 jaepien gietjeste lij akte vihkeles heannadimmie saemiej histovrijisnie. Dïhte voestes rïjhketjåanghkoe lij goevten 6.b. 1917 Metodistegærhkosne Tråantesne. Elsa Laula Renberg, akte åarjelsaemien nyjsenæjja, skraejriem veelti daan rïjhketjåanghkose.
Saemiedigkie, Tråanten tjïelte jïh Åarjel-Trööndelagen fylhkentjïelte edtjieh ektesne daam histovrijen heannadimmiem mïerhkesjidh goh akte nasjovnaale heevehtimmie jïh akte tjåenghkies saemien heevehtimmie. Dïhte edtja aaj viehkiehtidh skreejredh meatan årrodh demokratijen gaavhtan jïh akten heevehtæmman sjïehteladtedh aaj Trööndelagefylhki ålkoli.
Saemiedigkie, Tråanten tjïelte jïh Åarjel-Trööndelagen fylhkentjïelte leah vielie goh aktem jaepiem aktem åvtebarkoem dorjeme, jïh dan gåhkese båateme guktie akte prosjektestuvreme lea tseegkesovveme. Ida Marie Bransfjell lea barkoem åådtjeme goh prosjekten åvtehke jïh Kjell M. Deraas goh programmen åvtehke.
Stuvremedåehkie Saemieheevehtæmman 2017 tjïerth/siebrieh jïh institusjovnh åarjelsaemien dajvesne tjåanghkose bööredi njoktjen 17.b. 2015 Tråantesne. Tjåanghkosne 30 almetjh lin stïeresne. Desnie tjïelkesti dan boelhken bïjre mij lea vaaseme, hijven gaskesinie jïh ohtsemi bïjre dejtie departemeentide mah byöroeh meatan årrodh heevehtimmesne. Soejkesji sisnie akte gamte kultuvresuerkie goh musihke, filme, teatere, lidteratuvre, gaarsjelimmie, kåanste, duedtie, saemien beapmoe. Akte åejviebielie heevehtimmeste sæjhta årrodh boelhken goevten 6.b. 2017 bïjre.
-Jïjnjh hijven raerieh böötin mejtie heevehtimmie byöroe leavloem bïejedh, jïh doh ovmessie saemien institusjovnh jïh siebrieh stoerre eadtjohkevoetem vuesiehtieh heevehtæmman. Akte dejstie raeriestimmijste lij aktem hijven nommem heevehtæmman gaavnedh, stuvremedåehkien åvtehke Rune Kjenstad jeahta.
Saemiedigkieraerien politihkeles raeriestæjja Runar Myrnes Balto jeahta Saemiedigkien syjhtedasse lea abpe Saepmie edtja meatan årrodh dennie stoerre heevehtimmesne.
-Mijjieh våaromem mijjen åålmegebeajjan heevehtibie, jïh abpe Saepmie edtja meatan sjïdtedh. Dejnie åejviesijjine Tråanten jïh åarjelsaemien bïjre, jïh heevehtimmine fïerhtene saemien voenesne, heevehtimmie edtja saemien gïelem, kultuvrem jïh siebriedahkejieledem eevtjedh jïh våajnoes darjodh, Balto jeahta.
Govlehtallije: Rune Kjenstad, Tråanten tjïelte, tell.: 952 63 524
Govlehtallije: Runar Myrnes Balto, Saemiedigkie tell: 977 73 778