Govven/Guvvie/Foto: Ajfer Husejin
- Manne geerjene ihke strategije aaj saemien gïele-, kultuvre-, jïh aerpievuekien daajroem gorrede. Mijjieh tjuvtjiedamme dan maahtose maam saemien siebriedahke sæjhta daarpesjidh båetijen aejkien. Naemhtie mijjieh dam saemien siebriedahke- jïh barkoejieledem nænnoestehtebe, saemiedigkiepresidente Vibeke Larsen jeahta.
Reektehtse «OECD Skills Strategy Diagnostic Report Norway» goevteste 2014 våaromem beaja strategijetjaatsegasse. Åejviedïjre daennie tjaatsegisnie lea Nöörje, jalhts hijven nuepieh gååvnesieh, ij buektehth årroji maahtoem nuekies hijven nuhtedh. Dïhte gaskem jeatjah haestiemidie tjuvtjede goh jeenjesh eah lïerehtimmiem jïh ööhpehtimmiem tjïrrehth jïh vuelege jïebne evtiedimmie tjïrrehtimmesne lïerehtimmeste jïh ööhpehtimmeste, ij leah jïebnevoete faalenassen jïh tjoemehtassen gaskem, jïh varke jarkelimmieh barkoejieleden maahtoekrïevenassesne.
Nasjonaale strategijetjaatsege aaj doh sjïere haestemh jïh daerpiesvoeth gorrede mejtie saemien barkoejielede åtna gelliej smaaveskaalasïeltigujmie, aalkoejielemh, ovseekere lïerehtæjjaöörnege jïh jeenjesh skuvlem orrijieh. Nasjonaale strategije edtja gorredidh guktie nuekies maehteles barkoefaamoe gååvnese, hijven maahtoe jïh ulmiestuvreldh lïereme barkoejieliedisnie.
- Manne madtjeles ihke Saemiedigkie lea meatan orreme prosessesne akten aareh boelhken raejeste. Saemiedigkie lea dåarjoem åådtjeme sov lahtestimmide reerenassen nasjonaale maahtoepolitihkeles strategijese, Larsen jeahta.
Saemiedigkie Maahtoedepartemeentine ektine konferansem «Saemien perspektijve nasjonaale maahtoestrategijesne» öörnedi Tromsøesne giesien 2016, gusnie Saemiedigkie nuhteligs raerieh åadtjoeji guktie edtji saemien perspektijvem strategijesne sjïehtesjidh.
«Kompetanse Norge» (Maahtoe Nöörje) mij akte nasjonaale faageårgaane sjïere fokusninie geerve almetji lïerehtæmman, lea dan voestes aejkien prioriteradamme vierhtieh saemien prosjektide 2017, båatsoen, mearoesaemien göölemen jïh duedtien sisnjeli. Lïerehtimmie maahta vadtasovvedh dovne saemien jïh nöörjen gïelesne.
Gihtjehtimmie:Gaskesadth: saemiedigkiepresidente Vibeke Larsen, tell: +47 941 30 116
Vielie bïevnesh:Seniorraeriestæjja Kari Skoglund Sara, tell: +47 474 19 213