Saemien Parlamentarihkeles Raerie (SPR), mij lea dej golme Saemiedigkiej laavenjostoeårgaane, lea Saemien raasteheaptoemoenehtsem nammoehtamme. Moenehtsen barkoe lea raasteheaptoeh damtijidh mah laavenjostoem jïh ektievuekiem geerve darjoeh saemiej gaskemsh staateraasti ovmessie bieline, jïh haestemh sjugniedieh almetjidie, fuelhkide, siebride, institusjovnide jallh dejtie mah jielieminie gïehtelieh.
Dov jallh dov siebrien jallh barkoesijjien leah dååjrehtsh mej bïjre moenehtse byöroe daejredh? Gaskesadth mijjem jïh tjaelieh diekie samediggi@samediggi.no jïh mïerhkh meejlem «Saemien raasteheaptoemoenehtse». Tjaelieh maaje buerkiestimmiem dov haestemigujmie. Moenehtse gamte goerkesem sæjhta dejstie haestiemijstie raasth Saapman sjugniedieh. Moenehtse sæjhta dov åssjalommesh åadtjodh voerhtjen 15. b. raajan.
Såemies teemah mah leah sjyöhtehke moenehtsasse:
- Barkoe – gosse staateraastem restede gosse edtja barkosne mïnnedh
- Staateårrojevoete – haestemh almetjidie jïh fuelhkide gosse jieniebinie laantine årroeh
- Skuvle – maadthskuvlelaavenjostoe raastedajvine
- Jillebe ööhpehtimmie – ektie saemien studijh jïh studeentejielede
- Healsoe – faalenasse raastedajvine jïh ektie faalenassh
- Duedtie – maarhkededoekeme jïh kultuvre – kultuvrebarkoe jïh doekeme raasten mubpene bielesne
- Båatsoe raastedajvine- juvrepolitihke, aaj maaksoegyhtjelassh, kreekedåakteregïehtjedimmie jnv. (moenehtse ij sïjhth gyhtjelassh gåatomen bïjre vuarjasjidh)
- Prosjektestuvreme – Dåarjoeöörnegh jïh ektie prosjekth
Moenehtsen lïhtsegh leah:
Runar Myrnes Balto, moenehtsen åvtehke (nöörjen bielie)
Anders Kråik (sveerjen bielie)
Ulla Magga (såevmien bielie)