- Manne joekoen strerkestem dejtie konsekvenside daate politihke dejtie åarjelsaemien årroejidie dajvesne åådtje, saemiedigkieraerie Mariann Wollmann Magga jeahta.
Hedmaarhke jïh Oslon, Akershusen jïh Østfolden juvremoenehtsh voestegh lisensevuetjemem sïejpeste nænnoestin juvresovnan ålkolen. Daate nænnoestimmie lij aaj vuetjemen bïjre sïejpijste dehtie mij gohtjesåvva Osdalsdåehkeste mij åajvahkommes sïejpesovnan ålkolen höölteste. Mænngan moenehtsh nænnoestimmiem darjoejin vuetjemen bïjre sïejpeste sïejpesovnan sisnjelen. Klijma- jïh byjreseministere Vidar Helgesen bæjhkoehti 20.12.2016 daate sïejpevijreme maam moenehtsh leah nænnoestamme ij sïjhth nierhkedh.
- Manne guermiestamme ministerinie mij ij nænnoestimmieh krööhkh mejtie juvremoenehtsh leah dorjeme, jïh dan fåantoen gaavhtan dle gaajhkh lïhtsegh juvremoenehtsisnie regijovnesne 5 Hedmaarhke jïh golme dejstie lïhtsegijstie regijovnesne 3 Opplaante sijjen tjirkijebarkoem hiejhteme, Wollmann Magga jeahta.
Dïhte tuhtjie Klijma- jïh byjreseministeren dååsverimmie sagke rovnegåbpoe sjædta gosse Stoerredigkie gïjren 2016 jeehti dah sïjhtin behtjiedimmiem gåatomejielieminie giehpiedidh viehkine reeremistie sïejpedåehkeste.
- Ministere sjeavohth tjahkasji gellie askh mearan juvremoenehtsh barkoem darjoejin raerien mietie Byjresedirektoraateste, jïh dan mænngan Stoerredigkiem ierieli jïh vuetjemem tjöödtjesti. Daelie reerenasse tjuara dïedtem vaeltedh Stoerredigkien juvreliktesem tjïrrehtidh gusnie edtja tjïelke årrodh daerpies råajvarimmieh edtjieh dorjesovvedh dovne juvrereeremen jïh båatsoen sisnjelen juktie tsiehkiem åarjelsaemien båatsose gorredidh, Wollmann Magga jeahta.
Saemiedigkieraerie lea gellien aejkien jeahteme sïejpe ij edtjh saemien dajvine gååvnesidh.
- Manne bïllem Klijma- jïh byjreseministeren dååsverimmien gaavhtan juvrereeremisnie dle raaktan daate sjugniehtåvva, dej illedahkigujmie daate sæjhta vedtedh dejtie åarjelsaemien årroejidie sïejpesovnan lïhkebisnie, Wollmann Magga jeahta.
Dan åvteste Reerenasse luhpede sïejpe åådtje tjovkh åadtjodh sïejpesovnan ålkolen dle sïejpedåehkieh lïhkebe båetieh dan saemien båatsoedajvese. Saemiedigkieraerie bælla jienebh sïejph sijhtieh gilkedidh daennie dajvesne, gaskem jeatjah Osdalsdajveste jïh daate sæjhta dejtie konsekvenside lissiehtidh maam utnieh gosse sïejpe lea båatsoedajvine jallh båatsoedajvi lïhkebisnie.
- Åarjelsaemien årrojh leah joe håvhtadamme gelline suerkine. Dovne gïele, kultuvre jïh siebriedahke. Båatsoe åarjelsaemien dajvine lea akte vihkeles guedtije kultuvreste jïh aaj joekoen vihkeles juktie åarjelsaemien gielem vaarjelidh jïh nænnoestehtedh. Seamma tïjjen båatsoe lea jieliemasse dejtie fuelhkide mah bovtsigujmie gïehtelieh. Saemiedigkieraerie veanhta ij gåaredh gænnah sïejph utnedh dejnie dajvine gusnie saemien båatsoe, Wollmann Magga jeahta.
Klijma- jïh byjreseministere lea daelie sjæjsjalamme mïerhkesjimmine sïejpeste nierhkedh, gaskem jeatjah Osdalsdajvesne, mij åajvahkommes sïejpesovnan ålkolen hööltestieh, jïh saemiedigkieraerie Wollmann Magga veanhta daejnie mïerhkesjimmine dle vååjnoe goh ministere pryövoe luhpiedidh sïejpe edtja annje årrodh sïejpesovnan ålkolen.
- Saemiedigkieraerien krïevenasse lea juvremoenehtsi nænnoestimmie vuetjemen bïjre sïejpeste edtja tjïrrehtamme sjïdtedh jïh dellie ij gåaredh pryövedh dam stïssedidh viehkine aelkedh sïejpem mïerhkesjidh, Wollmann Magga jeahta.
Minngemosth Magga maahta bievnedh saemiedigkieraerie lea tjåanghkoen bïjre birreme staateministerinie juktie dam nåake tsiehkiem digkiedidh mij juvrereeremisnie sjugniehtovveme.
Govlehtallije: Saemiedigkieraerie Mariann Wollmann Magga +47 977 02 350