Aktene preessekonferansesne Stoerredigkesne gaskevåhkoen, reerenasse jïh laavenjostoekrirrieh aktem ektie latjkoem åehpiedehtin gusnie låhkoe tjïeltijste geahpene 428 tjïeltijste 358 tjïeltide. Krirrieh aaj tjïelkelaakan tjïertestin barkoe tjïeltegiehpiedimmine sæjhta jåerhkedh, jïh daelie ajve aalkoem regijovnereformesne vuajneme.
Daate dovne reerenassem, regijovnaale jïh tjïelten åejvieladtjide jïh Saemiedigkiem haasta orrelaakan ussjedidh akten nænnoesåbpoe laavenjostoen bïjre byögkeles dïenesjefaalenassi bïjre saemien årroejidie.
–Mijjieh aktem evtiedimmiem vuejnebe gusnie tjïelteraasth edtjieh unnebe ulmiem utnedh årroji reaktide båetijen aejkien, jïh daelie akte jarkelimmie vielie gasketjïelten laavenjostoen vööste, ektine nænnoesåbpoe individuelle reaktajgujmie ovmessie byögkeles dïenesjidie. Jis edtja vuesiehtimmien gaavhtan saemien gïelereaktah illedh dle akte krïevenasse tjïelth buerebelaakan laavenjostoe båetijen aejkien juktie sijjen årroejidie aktem hijven faalenassem vedtedh, saemiedigkieraerie Lars Filip Paulsen jeahta, mij dïedtem åtna regijovne- jïh tjïeltereformen åvteste.
Saemien dåeriesmoeretjoelmh våajnoes dorje
Saemiedigkieraerie gåabpegh reformh lïhke dåerede, jïh sæjhta annje saemiepolitihkeles gyhtjelassh bæjjese lutnjedh, mah eah tjoerh åajaldovvedh gosse orre nöörjen tjïelth edtjieh tseegkesovvedh jïh tjïeltelaavenjostoe edtjieh evtiesovvedh.
Doh jeanatjommes tjïelteiktedimmieh dorjesuvvieh saemien dajvi ålkoli, men såemies prosessh leah juhtieminie gusnie saemien tjïelth leah akte bielie. Saemiedigkieraerie Lars Filip Paulsen jeahta jalhts tjïelteraasth eah edtjh naan ulmiem utnedh dïenesjefaalenassese dejtie saemien årroejidie sïejhmelaakan dagkerh tjïeltine, dle læjhkan vihkeles leavloem bïejedh daerpiesvoetide mejtie doh saemien byjresh jïjtjh leah åvtese gieseme.
–Ij leah seekere doh raeriestamme vuekieh leah dah mah bööremeslaakan saemien ïedtjh gorredieh. Saemiedigkie sæjhta dan åvteste jåerhkedh barkedh juktie vuekide gaavnedh mej bïjre seamadamme jïh mah saemien ïedtjh bööremeslaakan gorredieh, jeahta.
Saemiedigkie vielie dïedtem sæjhta
Saemien siebriedahke hijven regijonaale goerkesem åtna, dan åvteste dïhte aerpievuekien saemien dajve lea joekedamme dej njieljie ovmessie nasjonaalestaati gaskem jïh ovmessie åejvieladtjedaltesi gaskem. Saemien åålmege dan åvteste daajra dej jïjnji ovmessie sjïere haestemi bïjre mah maehtieh jijhtedh, jïh Saemiedigkie lea guhkiem hijvenlaakan laavenjosteme dovne fylhkentjïeltigujmie jïh tjïeltigujmie, jïh aaj åejvieladtjedaltesi dåaresth.
Paulsen jeahta reformelatjkoe tjïelkelaakan jeahta faamoe edtja juakasovvedh tjïeltide jïh fylhkentjïeltide, men dellie aaj vihkeles evtiedimmiem Saemiedigkien råålleste jïh faamoste vuartasjidh, juktie ïedtjide saemien årroejidie gorredidh.
–Daan biejjien vuejnebe doh stööremes heerredimmieh juktie saemien ïedtjh gorredidh daamtaj leah faatoes ektiebarkoen gaavhtan tjïelti gaskem jïh fylhki gaskem. Mov mïelen mietie dle regijovnereforme aaj tjuara Saemiedigkien åållese vuartasjidh aktene orre regionaalestruktuvresne. Dastegh tjïeltereforme edtja maereles årrodh saemien siebriedahken vuajnoen mietie, dle saemiepolitihkeles barkoe tjuara læssanidh jïh Saemiedigkien råålla goh almetjeveeljeme årgaane tjuara læssanidh dovne nasjonaale jïh regijovnaale, saemiedigkieraerie jeahta.
Saemiedigkie aaj riejries stuerebe dïedtem vaeltedh noerhtedajvepolitihken åvteste jïh sæjhta akte pro-aktijve guejmie årrodh digkiedimmesne mij lea saemiej jïh noerhtedajvi bïjre.
Vielie vaestiedassh jïh gihtjehtimmie, govlehtallh saemiedigkieraeriem, Lars Filip Paulsen, mobijle: 916 18 561