- Manne madtjeles saemien jielemebarkijh jïh tjirkijh lin meatan daan jaepien beapmoemeessesne. Daate vuesehte staatuse saemien beapmoekultuvrese jïh fealadassese lea akten nasjonaale daltesasse lutnjeme. Dam garmerdibie, saemiedigkieraerie Mariann Wollmann Magga jeahta, mij lij rïhpestimmesne meesseste tsïengelen 20.b.
Laanteburrie- jïh beapmoeministere Jon Georg Dale lij aaj stïeresne beapmoemeessesne.
Sjïere beapmoekultuvre
Noerhte-Nöörje jïh saemien beapmoeprodusenth leah stïeresne orreme meessesne vïjhte jaepieh gaevnjieruktie dæjmetje jaepien raajan. Saemiedigkieraerie veanhta daate vuesehte saemien beapmoekultuvre lea sjïere laanten ektiedimmesne, naakede maam Saemiedigkie sæjhta voerkeslaakan nuhtjedh sov barkosne jåarhkeevtiedimmiej bïjre beapmoste.
- Manne gellie nuepieh vuajnam utnijh aelhkebelaakan saemien sjïere beapmoeh gaevnieh. Ektiedimmie beapmoebarkoen jïh fealadassen gaskem sæjhta gåabpegh jielemh nænnoestehtedh, saemiedigkieraerie Mariann Wollmann Magga jeahta.
- Mijjieh tuhtjebe akte jååhkesjimmie aktöörijste goh Ellinor G. Utsi Davvi Siideste jïh Eva Nordfjell sïelteste Rørosrein, gosse dah beapmoeministeristie bööresuvvieh meatan årrodh Reerenassen barkosne voenges beapmose jïh fealadassese, Magga jeahta.
Aaj Nöörjen Båatsoesaemiej Rijhkesiebrie åvtehkinie Ellinor Marita Jåma lin meatan jielemedelegasjovnesne.
Sæjhta saemien beapmoem åehpies darjodh gaskenasjonaale
Saemiedigkie lea jaepien 2017 prioriteradamme sjïere beapmoeh saemien dajvijste evtiedidh.
- Mijjieh aaj meatan aktene laavenjostosne evtiedimmien bïjre aktede stuerebe beapmoeprosjekteste maam Innovasjovne Nöörje stuvrie. Visjovne lea Noerhte-Nöörjem darjodh goh akte gaskenasjonaale åehpies beapmoeregijovne jïh manne gegkestem mijjieh maehtebe dam jåerhkedh aktine åejvieprosjektine daan jaepien. Manne gegkestem mijjieh maehtebe jåarhkeevtiedimmiem saemien beapmoste lissiehtidh – dovne båatsoe, jåartaburrie jïh gööleme jïh gaajhke maam eatneme faalehte, akte stoerre nuepie gååvnese dam darjodh, Magga minngemosth jeahta.