Giesien 2012 Saemiedigkie 330 gåetieh goerehtamme, prosjekten sjïekenisnie «Identifisering og registrering av samiske bygninger/ Damtijimmie jih vihtesjadteme saemien gåetijste».
Jaepien 2011 Saemiedigkie, laavenjostosne Riksantikvarine, aktem vïhtesjadtemeprosjektem saemien gåetijste eelki. Barkojne nïerhkeme seamma aejkien noerhtesaemien dajvesne, maarkesaemien dajvesne jïh åarjelsaemien dajvesne. Prosjekte edtja damtijidh, vïhtesjadtedh jïh vuarjasjidh jïjtsistie vaarjelamme jïh ånnetji urrebe saemien gåetieh. Daan giesien goerehtin tjïeltine Gaala, Aarborte, Skånland, Deatnu jïh Åarjel-Varanger.
Dan 3-japien prosjekten tjïrrh dle Saemiedigkie sæjhta saemien gåetieh vïhtesjadtedh mah leah båarasåbpoe goh 100 jaepieh, jïh dannasinie jïjtsistie vaarjelamme abpe Nöörjesne.
Saemien kultuvre jïh daajroeguedtijh
-Båeries saemien gåetieh jïjnjh kvaliteeth utnieh mejtie vihkeles vaarjelidh. Dah aktem histovrijem saemien kultuvren jïh identiteeten bïjre soptsestieh, jïh dannasinie vihkeles vïhtesjadtedh jïh gorredidh saemien gåetieh, prosjekten åvtehke Mia De Coninck jeahta. Daah gåetieh leah akte vyörtegs kultuvreaerpie, jïh byïroeh gorresovvedh goh saemien kultuvre- jïh daajroeguedtijh, De Coninck jeahta.
Saemiedigkien prosjekten åvtehke Mia De Coninck jeahta dah aktem hijven laavenjostoem åtneme gåetieaajhterigujmie daan giesien goerehtimmine. Mijjieh jïjnjh iedtjije histovrijh gåetiej bïjre govleme. Jïh mijjieh jïjnjh aajhterh gaavnedamme mah daejtie gåetide gorredamme. Gåetieaajhterh sijhtieh prieviem åadtjodh tjirrehtamme goerehtimmien bïjre goeven 2012. Desnie aaj haestebe jåerhkedh gåetide gorredidh, jïh dam bööremeslaakan dorje iemie åtnojne jïh jaabnan vaaksjominie jih gorredimmine. Jis daerpies gåetiem bueriedidh, edtja dam darjodh Saemiedigkine ektine.
Goerehtamme 330 gåetieh
Saemiedigkie daan mearan ryöokneme 130 buvrieh, 70 gåetieh, 24 fievsieh, 8 moeltetjeallerh jïh 3 derhviegåetieh. Dah buvrieh gelliesåarhts åtnoem åtneme, jïh joekehtslaakan bigkesovveme. Dah maehtieh geehpes jïh gæjroeh årrodh jallh leevles jih duvhties. Goh juelkiebuvrie jallh gierkiej nelnie tjåadtjodh. Gåetijste sagki jienebh såarhth, 1, 1 ½ jallh 2 etasjh, 2 tjiehtjeligujmie, 4 tjiehtjeligujmie , dïmperegåetie jallh ij. Gaajhkh såarhth gåetieh jïjtselaakan akten saemien baelien bïjre soptsestieh.
Edtja daatide jïh tjaatsegidie mejtie tjöönghkeme daej gåetiej bïjre nedtesæjrose Askeladden bïejedh, Riksantikvaren nasjovnaale daatavåarhkoe kultuvremojhtesidie. Maahta daennie nedtesæjrosne ohtsedidh http://www.kulturminnesok.no/
Aajhterh jïh bievnijh ohtsede
Mubpien jaepien dle Saemiedigkie sæjhta goerehtimmieh utnedh Tromsesne jïh åarjelsaemien dajvesne. Jis datne aajhtere aktede båeries saemien gåeteste, jallh dov lea voenges daajroe saemien gåetiej bïjre jïh sïjhth daejnie viehkiehtidh, maahtah Saemidigkine govlesadtedh. Seedth maaje guvviem jïh bïevnesh gåetiej bïjre, prosjekten åvtehke Mia De Coninck jeahta.
Prosjekten åvtehke Mia De Coninck, telj. 78 47 40 23, mobijle 90 79 98 19, e-påaste:
mia.de.coninck@samediggi.no
Prosjekten barkije Elin Kristina Jåma, tell. 78 47 40 34, mobijle 94 82 59 78, e-påaste:
elin.kristina.jama@samediggi.no
