Daennie rohkelassesne rohkelibie Jupmelen syjhtede edtja gaajhkine aatine jïh almetjinie sjugniehtovvedh. Jupmelen reeremisnie gaajhke, bene doen’ajmoeh maehtieh faamoem vaeltedh almetji bijjelen. Mijjieh rohkelibie Jupmelen syjhtede edtja sjugniehtovvedh, jïh mijjieh rohkelibie mijjieh sïjhtebe Jupmelen syjhtede mijjem stuvrie, mijjen jielemh, mijjen fuelhkie jïh maadtoe, åålmege, mijjen gærhkoe, hearrah jïh mijjen åvtehkh voenine, staarine, laantine. Jupmelem leajhtedem? Aehtjebem jïh tjidtjebem leajhtedem? Daamtaj sïjhtem maam akt darjodh misse mov eejhtegh ”ijje” jiehtieh. Mænngan vuajnam dah buerebelaakan deejrin, jïh manne byöreme dejtie goltelidh! Jïh Jupmele – dïhte daajra mij lea hijven munnjien. Dle sïjhtem badth jiehtedh – baajh dov syjhtede sjugniehtovvedh. Vïenhth aelhkie jallh geerve darjodh maam Jupmele sæjhta, sijjeste maam datne jïjtje sïjhth. Daamtaj im rikti daejrieh mij lea Jupmelen syjhtede. Orre testamenten vaentjelh soptsestieh maam akt Jupmelen soejkesjen bïjre almetjidie, jïh ööhpehtimmeste gærhkosne. Dellie sïjhtem badth vielie daejredh mij lea Dan syjhtede. Jïjnje heannede, maam kanne Jupmele ij sïjhth edtja heannadidh. Dåaroe jïh neavroe leah nåake heannadimmieh. Dle badth mijjieh almetjh mah muenieh mejtie mijjieh sïjhtebe dejtie hijven aatide darjodh, jallh mejtie mijjem baajebe nåake aath aaj darjodh. Gaajhkine mij sjugniehtåvva, lea akte geajnoe Jupmielasse.
 

LUTHEREN BUERKIESTIMMIE:

Jupmelen hijven syjhtede sjugniehtåvva bielelen mijjieh dan bïjre rohkelibie, bene daennie rohkelassesne rohkelibie dïhte aaj tjuara mijjem sjugniehtovvedh.
 

Guktie naemhtie sjugniehtåvva?

Naemhtie sjugniehtåvva gosse Jupmele gaajhkh nåake soejkesjh jïh abpe nåake syjhtedem bahhesne tsööpkie, veartenisnie jïh mijjesne, mah sïjhtieh heerredidh Jupmelen nomme aejlieståvva jïh dan rïjhke edtja båetedh. Naemhtie sjugniehtåvva gosse Jupmele mijjem faamoem vadta sov baakojne, jïh mijjem jaahkosne vaarjele mijjen minngemes tijjese. Daate lea dan aarmogs syjhtede.
 

Akte låavthgåetie dovne årromesijjie, byöpmedimssijjie jïh akte sijjie ektievoeten gaavhtan. Akte låavthgåetie suajam vadta jïh vååjnoe goh almetji vaanterdimmie jïh ulmie. 

 

Bijbelisnie lohkebe nomaden almetjetjierti bïjre mah låavhtgåetesne årroejin. Tjåådtje Abrahamen bïjre, mij låavthgåetesne årroeji Isakinie jïh Jakobinie ektine (Hebr. 11.9), jïh Mosesen bïjre mij låavthgåetiem tseegki leejren ålkolen (2. Mos 33,7). 

 

Dah otnerassh aktene låavhtgåetesne maehtieh Aehtjiem, Baerniem jïh Dan Aejlies Voejkenem årrodh. Jïh doh jeatjah deakehkh leah almetjh mah sijjen jieledh dejnie bigkieh.