Luejhtieh mijjeste maam mijjieh meadteme, guktie mijjieh luejhtebe dejstie guhth mijjese meadteme
Gosse maam akt båajhtode darjoem, dle hojnesne sjïdtem mænngan, jïh soelkedimmien bïjre rohkelem. Maam sæjhta raaktan jiehtedh soelkedidh? Guktie maehtebe daejredh naaken mijjem soelkedamme? Guktie maehtebe daejredh gosse mijjieh jïjtje naakenem soelkedamme? Daennie rohkelassesne rohkelibie Jupmele mijjem soelkede dan åvteste maam mijjieh dorjeme, mij ij leah Jupmelen vaajtelen mietie. Jïh Jupmele mijjem soelkede gosse dan bïjre rohkelibie, ihke Jupmelem jaehkebe mijjem vaajmosne. Mijjieh iktegisth maam akt båajhtode darjobe fïerhten biejjien, man åvteste mijjieh tjoerebe gaatelassjedh Jupmielasse.
Sisvegen bïjre
Akte låavthgåetie dovne årromesijjie, byöpmedimssijjie jïh akte sijjie ektievoeten gaavhtan. Akte låavthgåetie suajam vadta jïh vååjnoe goh almetji vaanterdimmie jïh ulmie.
Bijbelisnie lohkebe nomaden almetjetjierti bïjre mah låavhtgåetesne årroejin. Tjåådtje Abrahamen bïjre, mij låavthgåetesne årroeji Isakinie jïh Jakobinie ektine (Hebr. 11.9), jïh Mosesen bïjre mij låavthgåetiem tseegki leejren ålkolen (2. Mos 33,7).
Dah otnerassh aktene låavhtgåetesne maehtieh Aehtjiem, Baerniem jïh Dan Aejlies Voejkenem årrodh. Jïh doh jeatjah deakehkh leah almetjh mah sijjen jieledh dejnie bigkieh.
