Almerijka pårtå
Almerijka pårtå ålggolin tjuodtju St. Peter. Dåppet guhkket vuojnná muhtem ålmmåv guhti suojmma lahkan. Låsså noadev guoddá. Vijmak jåvsåt. Sjuohket vuossav luojttedijn. De boahtá muhtem vájbas áhkásj váttse. Låssis iellem le merkajt guodám. Tsamát muhtem bágo St. Peterij ja sån suv sisi luojttá.
Ålmåj vuossav rahpá ja guokta sliggo girje buktá. Dát le Lutherusa stuorra katekissma ja Læstadiusa postilla, goarssát javllá. Madi sáhkat boahtá muhtem nuorra hestasiejbijn ja rikkasijn njunjen, tsamát muhtem bágo, ja sisi bæssá.
Ålmåj vas vuossan råggå ja gávnná biejvvegirjev: tjoaggulvisráden ja bisspaguovlloráden lev ájrrasin læhkám. Muhtem vuoras ålmåj suv hárrá, muhtem bágo tsamát ja liegga måjen sisi luojteduváj. Goalmádis dát ålmåj vuossan råggå ja gávnná kvitterigijt Kirkens Nødhjelpas, Misjåvnnåbargos ja.. Muhtem nuorra finánssaålmåj suv hárrá, muhtem bágo tsamát ja sisi bæssá.
De ålmåj moarát, St. Peterij gæhttjá ja moarrás jienajn javllá: gudi li gájka dá gejt sisi luojtá.. ælla má siján legitimasjåvnå! Håjes tjalmij St. Peter sunji gæhttjá ja javllá: Sij dåbddi Jesusav ietjas lånestiddjen ja ráddnan. Dat le sijá ájnna legitimasjåvnnå.
Mij le mijá stuorámus gæhttjalibme: ietjama bargoj nali luohtedit. Suttov majt vuostasj ristagisá árrat ájttsin lij stuoresvuohta, dav gåhttjun Hybris. Nav álkke lij bihko suttojt målsudit ja ådå sudduj gahttjat: Månnå lav gåjt dal unnin buorep dal duossta..
Åssko ij la juoga majt nahkap – ájnat vásstádus Jesusa dagojda
