Eatneme akte vadtese sjugniedæjjeste
Eatnemem almetjidie vadteme aavoen jïh åtnoen gaavhtan daennie veartenisnie. Almetje lea jåarteste sjugniedamme jïh aktem vihties laavenjassem åtna jåartan muhteste.
Mijjieh edtjebe eatnemem gorredidh jih dam reeredh guktie gaajhkesh maehtieh destie jieledh. Almetje sijjiem åtna aktene dajvesne jïh ij båastode. Saemieh lin åvtesne øørnedamme sïjtine. Vihties sïjth reaktoem utnin gåatodh, vïjredh jïh lidtedh dej dajven sisnjelen. Jis gieriesvoetem eatnamasse åådtje, dellie aaj aktem diedtem åtna dam vaarjelidh. Daan biejjien sïjtedïejvesem åajvahkommes båatsosne nåhtede.
Åvtesne almetjh lin tjarki gårredamme eatnamasse, bene guktie lea daan biejjien? Guktie almetjh eatnemem nåhtedieh daan biejjien? Krøøhkestibie eatnemem, jïh vietselesvoetem jih gieriesvoetem eatnamasse vuesehtibie? Guktie?
Sisvegen bïjre
Aktem Jupmelem jaehkedh, mij ij leah våajnoes, lea gaajh geerve. Bijbele jeahta Jupmele eatnemem sjugniedi.
Jupmele almetjem jåarteste sjugniedi. Jupmele almetjasse aktem sjïere laavenjassem vadteme, dej jeatjah sjugniedimmiej muhteste. Jupmele aarvadalleme almetjh edtjieh reerijinie, barkijinie jih dienesjæjjine årrodh. Ibie edtjh trumhpiestidh jïh jieledem jïh eatnemem daajesjidh. Jaemiedisnie almetjh edtjieh vihth jåartese sjïdtedh, jïh vihth jåarteste tjuedtjielidh dan minngemes biejjien. Eatneme lea akte bielie sjugniedimmeste. Eatneme sjædtoeh, beapmoeh, tjaetsiem jïh gaajhkem vadta, mejtie daarpesjibie. Almetjh leah iktegisth bearkadamme destie maam eatneme vadta. Saemien vuekien mietie lea vihkeles eatnemen gïelem goltelidh. Maam dïhte sæjhta jiehtedh? Mijjieh edtjebe vååregelaakan eatnamisnie fealadidh jïh ibie vielie eatnamistie vaeltedh goh eatneme tøøllie. Mijjieh edtjebe bueriesjugniedidh dam mij jeala. Mijjieh edtjebe gæjhtelesvoetesne Sjugniedæjjese jieledh, eatnemen vadtesi åvteste.
Velg emne:
