Saemien gærhkoe Åanghkeren njeeruvisnie

Åanghkere-njeeruven gærhkoe. Vååjnoe saemieh desnie årroeminie. Desnie jïjnjh saemien gåetieh. Numhtie guhkiem orreme; saemieh gåetide jïh buvride gærhkoen akten bealan tseegkin jïh laedtieh hæhtjojde mubpien bealan. Dah göökte kultuvh desnie lægan. Gaelmie-gaertienisnie jïjnjh saemieh juvlelgamme.

Jïjnjh almetji leah buerie mojhtesh saemien gærhkoe-sjeltiej bïjre. Buerie mojhtesh båeries jïh noere almetjidie ektiedieh jïh mojhtesh jis ektievoetem nænnoestieh.

Jovnesåhkoen stoere gærhkoe-sjeltie Åanghkerisnie. Gosse gyrhkesjeminie, dellie gærhkoe-gaagkijh saemien vaarjoejgujmie. Saemien gïele gærhkosne govloe gosse Bijbelistie lohkeminie jïh saalmh laavloeminie. Saemien liturgijem aaj utnieh. Numhtie dejnie gïeline naan jaepiej jïh muvhtene jeatjhlaakan.

Gærhkosne åatjobe ektievoetem nænnoestidh. Gosse Jeesus Kristusasse jaehkebe, dellie ektievoetem Jupmielinie jïh sinsitnine åadtjobe. Ij Jupmele sïjhth mijjieh kristegassjh edtjebe oktegh årrodh. Gyrhkesjimmesne ektievoete vååjnoe gosse ektesne jiehtebe guktie mijjen jaahkoe lea, gosse ektesne aejlies maalestahkem byöpmedibie jïh ektesne rohkelibie jïh laavlobe. Jeesuse jïjtje rohkelassem Mijjen Aehtjie mijjese ööhpeht

Gyrhkesjimmesne bijbelteeksth, prïeke, rohkelassh, saalmh jïh aejlies maalestahke. Fïerhten aejlegen akte aamhtese, guktie bijbelteeksth, prïeke jïh saalmh leah dan aamhtesen mietie. Laavkomen, skælloen, juvlemen jïh hïejen leah aaj liturgijh.

Saemieh gujht aavoedieh gosse saemien gïele gærhkosne govloe jïh saemien klaerieh, symbovlh, tjaalehtjimmieh, saalmh jïh musigkh saemien vuekiej mietie leah. Hijven gosse saemieh eah damth dah goh guessieh gosse gærhkosne leah. Gærhkoen åålmege jïh åålmegen raerie sijhtieh gaajhkesh edtjieh ussjedidh gærhkoe dej lea.

Guktie aajhtsebe gyrkesjimmie saemien gyrhkesjimmie lea? Gosse saemien gïele govloe? Gosse saemien gærhkoe-rïeseldahkh vååjnoeh? Gosse prïeke, rohkelassh, musigke jïh liturgije jeatjhlaakan leah? Gosse saemieh gærhkosne leah?