Aajjan soptsese

Aajja soptseste dellie gosse maadteraajjebe edtji pruvresne minnedh. Guhkie lij vaedtsedh jïh idtji dohkoe ryøhkh aktene biejjesne. Tjoeri liegkedidh naan belniej lïhke aktene jaevrie-bealesne. Mubpien aereden gosse fahkesti, dle vueptiesti satne gellie gaelmiej gaskesne gællasjamme. Bene idtji billijh. Lij govleme man geerve lij dejtie åemiehkidie foeresjidh vaereste dåvvese, gusnie gærhkoe lij dan aejkien goh ij lij naan geajnoe dohkoe. Dannasinie dïhte lihkemes fuelhkie dejtie åemiehkidie eatnamisnie juvli. Dan aejkien ij lij naan bihkedassh dan bïjre. Dah mah sealadin edtjin dan lïhke gællasjidh gusnie deejrin almetjh baalte bøøtin, dellie idtji sïjhth dan oktegh årrodh elleme gællasjin vuertiejin tjuedtjielimmiem. Dennie mieresne meehtin govledh gosse almetjh baalte vøølkin bovtsine. Dah meehtin tjoejeste dejstie smaave miesijste murriedidh mah råavkeminie. Dan guhkiem dah jielije idtji dejtie åemiehkidie sturrin, dellie raeffesne gællasjin.

Daate soptsese jaemeden bïjre. Bijbele jeahta mijjieh ”nahkestibie” gosse sealede (1 kor 15, 18). Ikth båetijen aejkien Jeesuse edtja bååstede båetedh goh veartenen gånka. Dïhte edtja sov rïjhkem bigkedh gusnie ij leah vielie naan bååktjege. 

Guktie dov åssjaldahkh jaemeden jïh juvlemen bïjre?

Aktem Jupmelem jaehkedh, mij ij leah våajnoes, lea gaajh geerve. Bijbele jeahta Jupmele eatnemem sjugniedi.

Jupmele almetjem jåarteste sjugniedi. Jupmele almetjasse aktem sjïere laavenjassem vadteme, dej jeatjah sjugniedimmiej muhteste. Jupmele aarvadalleme almetjh edtjieh reerijinie, barkijinie jih dienesjæjjine årrodh. Ibie edtjh trumhpiestidh jïh jieledem jïh eatnemem daajesjidh. Jaemiedisnie almetjh edtjieh vihth jåartese sjïdtedh, jïh vihth jåarteste tjuedtjielidh dan minngemes biejjien. Eatneme lea akte bielie sjugniedimmeste. Eatneme sjædtoeh, beapmoeh, tjaetsiem jïh gaajhkem vadta, mejtie daarpesjibie. Almetjh leah iktegisth bearkadamme destie maam eatneme vadta. Saemien vuekien mietie lea vihkeles eatnemen gïelem goltelidh. Maam dïhte sæjhta jiehtedh? Mijjieh edtjebe vååregelaakan eatnamisnie fealadidh jïh ibie vielie eatnamistie vaeltedh goh eatneme tøøllie. Mijjieh edtjebe bueriesjugniedidh dam mij jeala. Mijjieh edtjebe gæjhtelesvoetesne Sjugniedæjjese jieledh, eatnemen vadtesi åvteste.