Gærhkoen histovrije
300 jaepieh vaesiejin goske kristegassjh gærhkoeh utnin. Aerebi sijjen gåetide gyrhkesjin. Desnie ektesne byöpmedin dam maam fïereguhte dahkoe buakteme.
Gosse gærhkoeh tseegkin, sïjhtin gærhkoeh edtjieh seammalaakan årrodh goh romeri gåetieh gusnie guhkies buertien bïjre tjahkasjin. Fuelhkien åejvie buertien bijjie-gietjesne tjahkasji. Daaletje gærhkojne seammalaakan: hearra gærhkoen bijjie-gietjesne lea.
Gærhkoe aejlies sijjie. Båeries teestamentesne tjaalasovveme almetjh jïh Jupmele sjïehtesjin jïh dellie desnie aejlies sijjieh lin. Sinajen vaeresne, gusnie Movse dah luhkie båvrah åadtjoeji, aejlies sijjie sjïdti. Joekoen hijven olkene gyrhkesjidh. Jïjnjh almetjh lyjhkoeh pijlgrimminie mïnnedh. Mejtie olkene, Jupmelen sjugniehtimmien lihke, gyrhkesjidh jïh ij aajve gærhkosne? Dellie gyrhkesjimmieh gusnie maadtoeh orreme.
Sisvegen bïjre
Gærhkosne åatjobe ektievoetem nænnoestidh. Gosse Jeesus Kristusasse jaehkebe, dellie ektievoetem Jupmielinie jïh sinsitnine åadtjobe. Ij Jupmele sïjhth mijjieh kristegassjh edtjebe oktegh årrodh. Gyrhkesjimmesne ektievoete vååjnoe gosse ektesne jiehtebe guktie mijjen jaahkoe lea, gosse ektesne aejlies maalestahkem byöpmedibie jïh ektesne rohkelibie jïh laavlobe. Jeesuse jïjtje rohkelassem Mijjen Aehtjie mijjese ööhpeht
Gyrhkesjimmesne bijbelteeksth, prïeke, rohkelassh, saalmh jïh aejlies maalestahke. Fïerhten aejlegen akte aamhtese, guktie bijbelteeksth, prïeke jïh saalmh leah dan aamhtesen mietie. Laavkomen, skælloen, juvlemen jïh hïejen leah aaj liturgijh.
Saemieh gujht aavoedieh gosse saemien gïele gærhkosne govloe jïh saemien klaerieh, symbovlh, tjaalehtjimmieh, saalmh jïh musigkh saemien vuekiej mietie leah. Hijven gosse saemieh eah damth dah goh guessieh gosse gærhkosne leah. Gærhkoen åålmege jïh åålmegen raerie sijhtieh gaajhkesh edtjieh ussjedidh gærhkoe dej lea.
Guktie aajhtsebe gyrkesjimmie saemien gyrhkesjimmie lea? Gosse saemien gïele govloe? Gosse saemien gærhkoe-rïeseldahkh vååjnoeh? Gosse prïeke, rohkelassh, musigke jïh liturgije jeatjhlaakan leah? Gosse saemieh gærhkosne leah?
