Dah luhkie båvrah

Jupmele dejtie luhkie båvride Mosesasse vedti Sinai-vaeresne. Dah båvrah lin tjaalasovveme göökte gierkietaavline. Dah båvrah lin njoelkedassh guktie Jupmelen almetjh, israjelidth, edtjin jieledh. Jupmele almetjidie aktem laakem vadta ihke satne sæjhta gïemhpes årrodh dejgujmie. Maahta jiehtedh hijven mierieh jieliedasse, dïhte akte gieriesvoeten bæjhkoehtimmie Jupmielistie. Almetjh laakh daarpesjieh jis edtja öörnege jïh raeffie årrodh. Dah voestes golme båvrah leah almetji jïh Jupmelen gaskem. Dah tjïjhtje minngebe leah guktie lea almetji gaskemsh. Dah båvrah tjöönghkeldihkie dennie göökten-gïerth gieriesvoetebåvresne: Datne edtjh Jupmelem gaajhki bijjelen iehtsedh, jïh dov mubpie almetjh goh jïjtjemdh.

Datne naaken dejstie båvrijste tsööpkeme dan minngemes tijjen? Mij båvride geervemes steeredh?

Dålle baahkem, tjoevkesem jïh lïhkesvoetem vadta. Dålle praedteste, dïhte jeala. Tjuara jïjnjem haarjanidh jis edtja buektiehtidh dålle buala gaajhkene lehkesne jïh gaajhke-såarhts vearoldisnie. Saemiengïelesne ovmessieh baakoeh dållesne utnebe, gosse ålkone. Man stoerre dålle lea, mah båeltemsmoerh, dajve gusnie dållem beaja jïh jïjnje jeatjah ovmessie nommh dållese vedtieh. Dållen bïjre daamtajommes gierkieh bïejebe, mah edtjieh viehkiehtidh dållem steeredh. Jupmele sov almetjidie gierkieh dej 10 båvrajgujmie vadteme.

Mij tjåådtje dejnie 10 båvrine? Jupmele Mosesasse båvride vedti juktie israjelen almetjidie viehkiehtidh hijvenlaakan ektesne jieledh.

Dålle baahkem vadta jïh lea akte iemie gaavnesjimmiesijjie mijjese.