Låavtegisnie gyrhkesjidh?

Låavtegisnie dållen baalte tjahkasjibie, dellie ektesne libie. Desnie maanah jïh båeries almetjh, nyjsenæjjah jïh gaarmanæjjah ektesne leah, gaajhkesh seamma vyörtegs. Soeve mij berkeste lea goh mijjen rohkelassh mah bæjjese Jupmielasse juhtieh. Mejtie Aejlies Voejkene lea goh soeve?

Låavtege lea saemien gåetie gusnie hijven årrodh. Daejrebe guktie desnie dåemiedidh.

Naan sijjide lyjhkebe jïh naan sijjide ibie. Gusnie hijven årrodh, dejtie sijjide lyjhkebe.

Dïhte dovne låavtegisnie, gærhkosne jïh olkene domtoe: Jupmele gietskene. Jupmele amma gaajhkene lehkesne.

Guktie hijven lea joekehts sijjide gyrhkesjidh? Guktie numhtie / jïh guktie ij leah numhtie?

Gærhkosne åatjobe ektievoetem nænnoestidh. Gosse Jeesus Kristusasse jaehkebe, dellie ektievoetem Jupmielinie jïh sinsitnine åadtjobe. Ij Jupmele sïjhth mijjieh kristegassjh edtjebe oktegh årrodh. Gyrhkesjimmesne ektievoete vååjnoe gosse ektesne jiehtebe guktie mijjen jaahkoe lea, gosse ektesne aejlies maalestahkem byöpmedibie jïh ektesne rohkelibie jïh laavlobe. Jeesuse jïjtje rohkelassem Mijjen Aehtjie mijjese ööhpeht

Gyrhkesjimmesne bijbelteeksth, prïeke, rohkelassh, saalmh jïh aejlies maalestahke. Fïerhten aejlegen akte aamhtese, guktie bijbelteeksth, prïeke jïh saalmh leah dan aamhtesen mietie. Laavkomen, skælloen, juvlemen jïh hïejen leah aaj liturgijh.

Saemieh gujht aavoedieh gosse saemien gïele gærhkosne govloe jïh saemien klaerieh, symbovlh, tjaalehtjimmieh, saalmh jïh musigkh saemien vuekiej mietie leah. Hijven gosse saemieh eah damth dah goh guessieh gosse gærhkosne leah. Gærhkoen åålmege jïh åålmegen raerie sijhtieh gaajhkesh edtjieh ussjedidh gærhkoe dej lea.

Guktie aajhtsebe gyrkesjimmie saemien gyrhkesjimmie lea? Gosse saemien gïele govloe? Gosse saemien gærhkoe-rïeseldahkh vååjnoeh? Gosse prïeke, rohkelassh, musigke jïh liturgije jeatjhlaakan leah? Gosse saemieh gærhkosne leah?