Biejjiem jïh askem
Bierna Bientie gonnoeh Anna Jacobsenh ektesne saalmh jarkoestigan. Dej saalme Biejjiem jïh askem åehpiesommes lea. Bierna Leine Bientie lea hearra åarjelsaemide 1980-jaepiej aalkoelistie. Aajhtsi guktie vaenie saalmh åarjelsaemien gïelesne. Dellie jis eelki naan saalmh jarkoestidh. Akte dejstie lea Laudate.
Frode Fjellheim musigkinie barka jïh ovmessie musigkh dorjeme. Frode åarjelsaemien liturgiji melodijh dorjeme. Biejjiem jïh askem lea åarjelsaemien saalme, dan melodijem Frode dorjeme.
Sisvegen bïjre
Gærhkosne åatjobe ektievoetem nænnoestidh. Gosse Jeesus Kristusasse jaehkebe, dellie ektievoetem Jupmielinie jïh sinsitnine åadtjobe. Ij Jupmele sïjhth mijjieh kristegassjh edtjebe oktegh årrodh. Gyrhkesjimmesne ektievoete vååjnoe gosse ektesne jiehtebe guktie mijjen jaahkoe lea, gosse ektesne aejlies maalestahkem byöpmedibie jïh ektesne rohkelibie jïh laavlobe. Jeesuse jïjtje rohkelassem Mijjen Aehtjie mijjese ööhpeht
Gyrhkesjimmesne bijbelteeksth, prïeke, rohkelassh, saalmh jïh aejlies maalestahke. Fïerhten aejlegen akte aamhtese, guktie bijbelteeksth, prïeke jïh saalmh leah dan aamhtesen mietie. Laavkomen, skælloen, juvlemen jïh hïejen leah aaj liturgijh.
Saemieh gujht aavoedieh gosse saemien gïele gærhkosne govloe jïh saemien klaerieh, symbovlh, tjaalehtjimmieh, saalmh jïh musigkh saemien vuekiej mietie leah. Hijven gosse saemieh eah damth dah goh guessieh gosse gærhkosne leah. Gærhkoen åålmege jïh åålmegen raerie sijhtieh gaajhkesh edtjieh ussjedidh gærhkoe dej lea.
Guktie aajhtsebe gyrkesjimmie saemien gyrhkesjimmie lea? Gosse saemien gïele govloe? Gosse saemien gærhkoe-rïeseldahkh vååjnoeh? Gosse prïeke, rohkelassh, musigke jïh liturgije jeatjhlaakan leah? Gosse saemieh gærhkosne leah?
