Kristeles jaahkoe

Gieriesvoete kristeles jaahkoen maadtoe jïh ulmie. Gaajhke tjïelke gieriesvoete Jupmielistie båata. Gieriesvoete dïhte jielemem vadta.

Foto: Jim Elfström

Mijjieh maehtebe gieriesvoetem gaavnedh jeatjah almetjigujmie ektesne jïh Jupmielinie. Jupmele mijjen jielemem sæjhta jïh sæjhta fïerhten almetjinie ektine årrodh. Jupmelen tjïrrh åadtjoejibie vielie daejredh maam Jupmele sæjhta jïh gie dïhte Jupmele.
 
Jupmele almetjinie
Jesuse sjïere ektesne Jupmielinie, dïhte jïjtje Jupmele almetjinie. Soptsesh Jesusen bïjre dej njieljie vaentjielinie Bijpelisnie gååvnesieh. Bijpele lea gærja gellie boelhkine mah soptsestieh almetji dååjrehtsi bïjre Jupmielinie gaavnedidh.  Jesuse eatnamasse båata dan åvteste Jupmele mijjem eahtsa jïh sæjhta ihkuve aejkiem mijjese rïhpestidh, dovne jaememen åvtelen jïh minngelen. Jupmele sæjhta mijjieh edtjebe vielie maahtoem Jupmelen rijhken jïh gieriesvoeten bïjre åadtjodh.
 
Gærhkoen jarnge jïh jielemegaaltije
Gærhkoen jarnge jïh jielemegaaltije lea Jesus Kristuse jïh vaentjele dan bïjre. Vaentjele almetjem virtehte ektievoetese Jupmielinie, mij altese maadtoe jïh ulmie. Jupmielisnie velviem vijsiesvoeteste, aarmoste jïh gieriesvoeteste. 
Gærhkoen jaahkosne Jupmelem jaahka jïh Jupmelen åajvah dahkojste tseegkesovveme, mejtie Bijpielisnie vïhnesjamme jïh almetjidie dej jieliemisnie gaavnede. 
 
Rohkelimmie vihkeles
Gosse jaahka dellie gegkeste jïh gymhpe. Rohkelimmie jaahkoen sïejhmemes baalka. Jis rohkelidh ij daarpesjh jaehkedh. Vaajmoen reaktoevoete jïh aejvere rohkelæmman vihkeles.   Astoem rohkelæmman gaavnedh jïh dam tïjjem jïjtsasse jïh altese rohkelæmman vuekie jïh Jupmielinie aktanidh. Ij dan vihkeles guktie rohkelibie. Dle vaajmoen soptsestalleme Jupmielinie mij vihkeles.
 
Dïhte kristeles byjhkesjimmie
Dïhte kristeles gærhkoe byjhkesje aktem aajnege Jupmelem – Aehtjiem , Baerniem jïh Aejlies Voejkenem – mij sjugnehte, lutnjeste jïh jielehte. Svïenske gærhkoe akte bielie dehtie veartenevijries gærhkoste jïh kristeles byjhkesjimmiem jïh earoelaavlomem golmegen Jupmielasse veadtasåvva.  Jaahkoem byjhkesjimmien baakoej jïh dahkoej tjïrrh lahteste jïh aerpie dehtie apostoliske aejkeste. Dah golme båarasommes jaahkoebyjhkesjimmieh leah lahtesinie sjïere guktie jaahkoe jïh gærhkoe aejkijste aejkide tjåadtjoehtamme. Lohkh gööktesh dejstie daagkoe åelkies bielesne.
 
Evangeliske-lutherske gærhkoe
Svïenske gærhkoe evangeliske-lutherske vuekien mietie dennie augsburgske byjhkesjimmine jaepeste 1530 aktanadteme byjhkesjimmietjaatseginie. Byjhkesjimmietjaalegh reformatjovnetijjese vïhnesjimmien baalkam vuesehte guktie jaahkoem vaestiedassine buerkiestin dan tïjjen gyhtjelasside.

Gærhkoen jaahkoe jïh guktie lohkehtin dan teologiske reflektjovnen tjïrrh soptsestin mij dïhte jaahkoe jïh byjhkesjimmie. Aktegs kristegassjese jïh gærhkose barkoe fïerhten aejkesne ikth vielie jaahkose tjaangedh jïh tjïelkestidh guktie dam guarkedh. Vaallah jaahkoebyjhkesjimmie jallh lohkeme lea ulmie jaahkose. Dah kreajnoehtieh mij gærhkoen jaahkoe jïh jaahkoem buerkiestieh. Gosse soptsestalledh jeatjah vuekiejgujmie, gosse håaloemisnie jïh gyrhkesjimmesne Svïenske gærhkoe sov jaahkoem evtede buerkeste.

Apostoliske jaahkoebyjhkesjimmie

Skapad: 2011-05-31 15:30:00

Manne Jupmele Aahtjan jaahkam,
faamoehkommes, Elmien jïh eatnemen sjugniehtæjjese.

Manne Jeesus Kristusasse jaahkam,
Jupmelen aajnege baarnan, mijjen åajvan
gie Aejlies Voejkenen baaktoe åedtjine sjïdti,
Maarja nïejteste reakasovvi,
Pontius Pilatusen baelien njåvtasovvi,
kroessese noeresovvi, jeemi jïh kroeptese bïejesovvi,
våålese jaemede-rïjhkese vöölki,
gåalmeden biejjien jaemiedistie tjuedtjieli,
bæjjese Alman vöölki,
Jupmelen, faamoehkommes Aehtjien,
åelkies bielesne tjahkan,
gubpede vihth edtja bååstede båetedh,
jielije jïh åemie almetjidie dööpmedh.

Manne Aejlies Voejkenasse jaahkam,
gærhkoen aejlies ektievoetese,
aejlies almetji tjåanghkenæmman,
sådtoej luejhtiemasse,
åedtjien tjuedtjielæmman jïh ihkuve jieliemasse.
Aamen

Nicenske jaahkoebyjhkesjimmie

Skapad: 2011-05-31 15:30:00

Manne aajnehke Jupmelem jaahkam, faamoehkommes Aehtjie, sjugniehtæjja Alman jïh eatnamasse, gaajkeste maam vuajna jïh maam ij vuenjieh;
Aktem aajnehke Åajvan, Jesus Kristusasse, Jupmelen aajnehke baarnan, Aehtjeste reakasovvi gaajhkh aejkiej åvteste, Jupmele Jupmielistie, tjoevke tjoevkeste, saetnies Jupmele saetnies Jupmielistie, reakasovveme jïh ij Aehtjien seamma voejngeste sjugniehtamme, man tjïrrh gaajhkem sjugniehtamme; mah mijjese almetjidie mijjen åemievoeten gielhtie våålese elmeste båateme jïh aejlies Voejhkenen tjïrrh Maarja nïejteste almetjinie reakasovveme; aaj noeresovveme Pontius Pilatusen baelien, njåvtasovveme jïh kroeptese bïejesovveme, jïh guktie tjaalegisnie tjaaleme, gåalmeden biejjien alman tjuedtjielamme, Jupmele Aehtjien åelkies bielesne tjahkan, gubpede vihth edtja bååstede båetedh, hearlohkevoetesne jielije jïh åemie almetjidie dööpmedh, man rijhke ihkuve aajkan; jïh aejlies Voejkene, Åejvie jïh jieliehtæjja, Aehtjien jïh Elkien luvhtie, dïsse jaehkebe gie Aahtjan jïh Baarnan rohkele jïh dejtie earohte jïh gie profeeti tjïrrh soptsestamme; akten aajnehke, aejlies, ektievoeten apostoliske gærhkose.
Aktem aajnehke laavkomem jaahkam, sådtoej luejhtiemasse, åedtjien tjuedtjielæmman jïh båetije veartenen jielemem vuartam.
Aamen

 

//