Hoksegarantije abpe laantesne
Hoksegarantije dïhte sæjhta jiehtedh edtja hoksem åadtjodh sjïere tïjjemieresne. Dïhte lea laaken mietie bielie healsoe- jïh skïemtjehokselaakeste. Hoksegarantije jeahta mennie tïjjemierine edtja hoksem faalesovvedh laantedigkeste jallh regijovneste. Dïhte ij regleradh jis hoksem edtja vadtasovvedh jallh mij hokside edtja åadtjodh.
Hoksegarantije jeahta man guhkiem tjuara guhkemes vuertedh åvteli hoksem åadtjodh. Gååvnese ovmessie tïjjemierieh ovmessie hokside, vuesiehtimmien gaavhtan 7 biejjieh juktie åådtje dåakteren gåajkoe båetedh hoksejarngesne jallh 90 biejjieh dïsse mïnnedh, alternatijvele båehtjierdimmiem åadtjodh sjïere hoksesne. Jis ij gåaredh hoksem åadtjodh dej tïjjemieriej sisnie dennie hokseektievoetesne maam ohtsedamme, faalesåvva mïnnemem jallh båehtjierdimmie jeatjah hokseektievoetesne. Muvhtene maahta faaledh hokseektievoetese jeatjah laantedigkesne. Maahta eejnegen veeljedh jis sæjhta jiehtedh jaavoe jallh ijje faalemasse varkebe hoksen bïjre jeatjah hokseektievoetesne enn gosse ohtsedamme.
Ij hoksegarantije tsevtsieh akute hoksem. Jis akute skeamtja jallh arhkene edtja hoksem åadtjodh dan varki man gåerede.
Nasjovnelle Hoksegarantije 0–7–90–90
Hoksegarantijen mietie reaktam åtna:
- 0 – Primærhoksine gaskesadta seamma biejjien.
Seamma biejjien goh viehkiem ohtsede edtja åadtjodh primærehoksine gaskesadtedh, vuesiehtimmien gaavhtan hoksejarngine jallh skïemtjehokseraeriestimmine. Dïhte maahta telefovnine jallh mïnneminie årrodh.
- 7 – Dåakteremïnneme primærehoksesne tjïjhtje biejjiej raejesne.
Jis hoksebarkijh vuarjasjieh dåakterem daarpesje mïnnedh edtja tïjjem åadtjodh jeenjemes tjïjhtje biejjiej raejesne, vuesiehtimmien gaavhtan hoksejarngesne jallh fuelhkiedåakteren luvnie.
- 90 – mïnneme sjïere hoksesne 90 biejjiej raejesne.
Jis remissem åådtje sjïere hoksese edtja tïjjem mïnnemasse 90 biejjiej raejesne. Dïhte aaj luhpie jis hoksem ohtsedamme remissehts.
- 90 – Båehtjierdimmie aalka 90 biejjiej raejesne.
Jis båehtjierdimmiem sjæjsjali, vuesiehtimmien gaavhtan operasjovne edtja tïjjem åadtjodh 90 raejesne.
Gåessie ij hoksegarantijen tsevtsieh?
Hoksegarantije ij tsevtsieh
- bååstidemïnneme
- jis medisijneles sjïekiej åvteste byöroe guhkebe vuertedh goh garantijen tïjjemieriemedisijneles dïenesje, vuesiehtimmien gaavhtan laboratovrije- jïh röntgenegoerehtimmie
- salkehtimmieh jïh goerehtimmieh
- viehkievierhtiefassehtimmie, mohte ij gosse govlemeapparaath pryövh
- jis ijje jeehti faalemasse hoksen bïjre jeatjah hokseektievoetesne (jis dan mænngan saangerde maahta faalemasse jååhkesjidh).
Vuertemetïjjh hoksesne
Gååvnese nasjovnelle webbesijjiem gusnie hoksegarantijem jïh vuertemetïjjide vaaksjodh, Vantetider.se. Webbesijjesne vuesehte vuertemetïjjh gaajhkine laantedigkine jïh regijovnine.
Hokse jeatjah sijjesne
Jis faala mïnnemem jallh båehtjierdimmiem, mij ij maehtieh hoksegarantijen tïjjemieresne vedtedh, edtja faalemem jeatjah hokseektievoetesne. Dïhte maahta hoksejarngesne, skïemtjegåetesne jallh privaaten dåastoevisnie årrodh. Maahta jïjtje vaajtelidh gåabph sæjhta, mohte jis hoksegarantije edtja dååjredh, ij maehtieh frijjes veeljedh. Jis ij sïjhth hoksem åadtjodh jeatjah sijjesne enn gusnie ohtsedamme maahta hoksegarantijen faalemasse nyöjhkedh. Destie maahta sjïdtedh tjuara guhkebe vuertedh. Jis dan mænngan saangerde maahta eejnegen jïjtse hoksevedtiejasse bievnedh. Hoksegarantije dehtie daatojste aalka juhtedh.
