Maam jïh mejnie govlesadtebe

Vihkielommes govlesadteme-tsiehkesne leah seedtije, dåastoje, dïjre jïh medijume. Gosse datne jeatjabidie almetjidie maam joem beavnah jallh buaktah, dellie datne seedtije. Gosse bïevnesh åadtjoeh dellie datne dåastoje. Dam maam datne saarnoeh, dej bïevnesi sisvege, dïjrine gåhtjobe.

Medijumen tjïrrh buektebe bïevnesh seedtijistie dåastoejasse seedtedh. Medijume lea persovneles goh prievie, soptsestalleme jïh SMS:e. Medijume lea aaj byjjes govlesadteme goh TV:e, raadijove jïh plaerieh. Sosijaale medijumh maehtieh dovne persovneles jïh byjjes årrodh.

Almetjidie daaletje siebriedahkesne lea vihkeles maehtedh hijvenlaakan govlesadtedh. Njaalmeldh jïh tjaaleldh govlesadtemen tjïrrh maahtah jïjtjedh åssjaldahki bïjre soptsestidh, dov mïelh jïh vuarjasjimmieh mubpide almetjidie buektedh. Almetjh maehtieh aaj voejhkelidh datnem tsevtsedh. Jis ih daam vueptesth dellie aelhkebe datnem tsevtsedh. Datne maahtah ovmessie såarhth tjaalegh darjodh, gïetine tjaeledh jallh digitaale vuekine. Aaj maahtah gïelem jïh hammoem sjïehtedidh ovmessie åssjelidie, dåastoejidie, tsiehkide jïh medijumidie.

Vihkeles mujhtedh dåastoje maahta dïjrem guarkedh jïjtse mïeline. Ij daarpesjh dïjrem guarkedh seammalaakan guktie seedtije veanhta dïhte dåastoje edtja dam guarkedh.