Fagstoff

Analyse-goere

Marion Federl, Ellen Bull Jonassen, Liv Karin Joma
  • Innbygg
  • Enkel visning
  • Lytt til tekst
  • Skriv ut

 

Gosse edtjh argumentasjovnem buerkiestidh jïh vuarjasjidh aamhteseprosa-tjaalegisnie, dellie læstoe vuelielisnie maahta viehkine årrodh. Nuhtjh dejtie væhtide mah leah sjyöhtehke dan tjaalegasse datne goerehth.

Dastegh edtjh dov analysem åehpiedehtedh goh akte tjaaleldh tjaalege, datne jïjtje gaavnehth mennie öörnegisnie momenth edtjieh årrodh. Datne ih daarpesjh seamma öörnegem nuhtjedh mij daennie læstosne. Læjhkan iktesth væjsehke aelkedh dej vihkielommes bïevnesigujmie tjaalegen bïjre. Dellie sagke aelhkebe sjædta lohkijasse datnem dåeriedidh gosse datne dov vïhtesjimmieh veelelaakan åehpiedahtah.

 

1. Vihkielommes bïevnesh

       Aelkieh tjaalegem jïh govlesadteme-tsiehkiem åehpiedehtedh.

  • Rïektesvoete tjaalegen bïjre
    Nomme, sjangere, tjaelije 
  • Ïebne
    Mah gyhtjelassh jallh dåeriesmoerh tjaalegisnie?
  • Govlesadteme-tsiehkie
    Gusnie jïh gåessie tjaalegem bæjhkoehti, dagke mennie sjïere heannadimmesne/ektiedimmesne?
  • Tjaelijen maadtoe
    Datne byörh maam akt jiehtedh tjaelijen maadtoen bïjre dastegh dïhte akte tjïelke jallh nåake aevhkie tjaelijen ussjedammesvoetese.
  • Ulmie-dåehkie
    Gïese tjaelije tjaala?

 

 2. Veanhtoe jïh argumeente 

         Åehpiedehtieh tjaelijen veanhtoem jïh doh vihkielommes argumeenth.

  • Tjaelijen veanhtoe
    Mij lea tjaelijen veanhtoe?
    Tjaelije aamhtesem dåarjohte jallh aamhtesem vuastele, jallh veanhtoe jeereldihkie? 
  • Doh vihkielommes argumeenth
    Darjoeh åssjaldahke-kaarhtem dej vihkielommes argumeentigujmie tjaalegistie. Vaajesth dejtie åenehkslaakan jïh jïjtsedh baakoejgujmie. Tjaelijen akte tjïelke åejvie-argumeente? Tjaelije argumeenth vuastele mah lea altese vuajnoen vööste.

3. Nænnoesvoete, maerelesvoete jïh veaksehkevoete

      Goerehth aamhtese-argumeentide veelebe.

  • Nænnoesvoete
    Rïektesvoeth reaktoe jïh argumeenth buajhkoes?
  • Maerelesvoete
    Tjaalegen naan argumeenth mah ajve ånnetji jallh ij leah aamhtesen bïjre?
  • Veaksehkevoete
    Tjaalegen argumeenth mejtie aelhkieslaakan maahta vuastalidh dan åvteste sagke veaksahkåbpoe vuestie-argumeenth gååvnesieh? 
  • Veeljeme rïektesvoeteste jïh bagkesijstie
    Tjaelije gaajhkem meatan vaalteme mah leah vihkeles aamhtesasse? Jallh argumentasjovne aktelaaketje jallh såemies vaanoeh åtna? (Mujhtieh sjangere viehkehte moenedh man vijries jïh jïebne argumentasjovne byöroe jïh maahta årrodh tjaalegisnie.)
 

4. Tjeakoes argumentasjovne

      Goerehth guktie tjaelije domtesidie appellerede lohkijen luvnie.

  • Tjaelijen ussjedammesvoete jïh autoriteete
    Tjaelijen sjïere daajroeh jallh lea aktene sijjesne mij dïsse autoriteetem vadta aamhtesisnie? Lohkije leajhtadimmiem tjaeliejasse åådtje gosse tjaalegem låhka? 
  • Appelle dåastojen vuajnojde jïh domtesidie
    Tjaelije appellerede såemies vihties vuajnojde jïh domtesidie lohkijen luvnie? Boekte mah? Tjaelije nåakelaakan tjaala dej bïjre mah eah sov vuajnoem juekieh? 
  • Gïeleldh viehkievierhtieh
    Mah leah doh vihkielommes gïeleldh viehkie-vierhtieh tjaelije nuhtjie juktie sov dïjrem veaksahkåbpoe darjodh?

 

5. Tjaalege goh elliesvoete

       Gosse datne veelelaakan tjaaleginie barkeme dle aelhkebe væhtide vaestiedidh.

  • Jïebnevoete ræhpas jïh tjeakoes argumentasjovnen gaskem
    Mïsse tjaelije stööremes leavloem beaja, ræhpas jallh tjeakoes argumentasjovne? 
  • Åehpiedehteme-vuekie
    Tjaelije buektehte sov argumeenth åehpiedehtedh sjeakoeslaakan? Aelhkie tjaelijen argumentasjovnem dåeriedidh? Tjaelije vuesiehtimmieh vadta, tjïelkeste jïh veelebe buerkeste? 
  • Galhkuve-vuarjasjimmie
    Guktie tjaalege fungerede goh elliesvoete? Tjaalege buektehte datnem jaehkiehtidh?

 

   Baakoeh

 

 govlesadteme-tsiehkie

  kommunikasjonsituasjon

 ussjedammesvoete

  troverdighet

 veanhtoe

  standpunkt

 jeereldihkie

  variert

 nænnoesvoete

  holdbarhet

 maerelesvoete

  relevans 

 rïektesvoeth

  fakta

 buajhkoes

  sannsynlige

 aktelaaketje

  ensidig

 såemies vaanoeh åtna

  mangelfull

 leajhtadimmie

  tillit

 dïjre

  budskapet

 elliesvoete

  helhet

 jïebnevoete

  balanse

 leavloe

  vekt

 åehpiedehteme-vuekie

  framstillingsmåte

 galhkuve-vuarjasjimmie

  sluttvurdering

 jaehkiehtidh

  overbevise