Fagstoff

Draaman manuskripte

Tone Elisabeth Grundvig, Helen Blind Brandsfjell

Draaman tjaalege lea manuskripte mij teatere-vuesiehtimmien våarome. Manuskripten göökte bielieh, åejvie-teekste jïh bielie-teekste. Åejvie-teekstesne tjaaleme mah dorjehtæjjah jiehtieh jïh bielie-teekstesne scena- jïh regije-buerkiestimmieh.

Vuesiehtimmie dorjehtimmeste Raahkele-Pïere maam Albert Jåma tjaaleme.

1. Boelhke:

1. Scena:

Soptsestæjja: Gïetine saevehte jïh jeahta

Daate vuesiehtimmie ålvas guhkede dovletjistie. Dehtie aejkeste gåessie saemieh
vïenhtin sijjieh oktegh Saemie-eatnamisnie veasoeminie.

Naakenh saemijste låavthgåetien sisnie, jïh naakenh bïjre jarkan ostedalleminie. Joejkeminie lustestalleminie. Raeffie lij. Maanah stååkedeminie.Akte nyjsenæjja joejkeminie hearlohke Saemie-eatnemen bïjre.

Nyjsenæjja: Vuemieh dïeves vijrijste

naa, naa…

johkh dïeves loesijste

naa, naa…

stööhtjiste veljije

naa, naa…

gedtiste veljije

naa, naa…

bovtseste aaj

naa, naa…

Dialoge jïh monologe

Draaman åejvie-teekste aaj draama-dialogem gohtjesåvva juktie daesnie göökte jallh gellie almetjh soptsestellieh. Jis ajve akte råålla-gaagkoe soptseste, dellie dïhte monologe.

Scena-buerkiestimmieh

Scena-buerkiestimmieh bielie-teekstesne vihkeles bïevnesh mijjese vedtieh gusnie jïh gåessie mij akt heannede, jïh guktie scene vååjnoe. Naan draamah eah bielie-teeksth utnieh jïh dellie regisööre åådtje nænnoestidh guktie edtja årrodh. Jeatjah draamah guhkies bielie-teeksth utnieh gusnie jïjnjh buerkiestimmieh.