Dah sjïekh mannasinie abortem darjodh maahta jïjnjh årrodh. Dïhte maahta årrodh ij nahkesjh. Tuhtjie dan noere jallh ij heavedh daelie. Kaanne dïhte gie ektesne nåajsan sjïdteme ij leah dïhte gie sæjhta maanadovvedh.
Reaktam åtna abortem darjodh jïh ij daarpesjh dam jeatjide goerkelidh, seamma man sjïekenisnie. Dïhte lea abortelaakesne tjaaleme. Reaktam aaj åtna jarkesidh gåess´akt aborten åvteli.
Abortem darjodh ij darjoeh gïerve nåajsan sjïdtedh dan mænngan. Ij gååvnesh naan jaepieraaste abortem darjodh.
Aborten åvteli
Dïhte gie funterde abortem darjodh kaanne jïjnjh gyhtjelassh åtna jïh dellie hijven giejnie soptsestalledh. Gosse abortem sæjhta darjodh dellie viehkiem jïh dåarjoem dïsse faala, dovne åvteli jïh dan mænngan. Jis lea dïhte gie nïejtem nåajsan dorjeme maahta aaj naakenem gaavnesjidh jïh dejnie soptsestalledh jis sæjhta.
Nïejte gie nænnoste
Dïhte åålegh hijven dejnie sopstestalledh gïejnie nåajsan sjïdteme guktie sïjhtijægan darjodh. Jis gåarede hijven jis maehtiejægan ektesne sjæjsjalidh. Mohte jis eakan sïemedh dellie åålegh nåajsan nïejte gie sjæjsjele jis edtja abortem darjodh vuj ij dam sïjhth. Dïhte gie nïejtem nåajsan dorjeme ij reaktam utnieh oktegh sjæjsjalidh jis edtja abortem darjodh jallh maanam utniehtidh.
Partnere orre dïsse gie abortem dorje
Saaht jis sïemes jis galka abortem darjodh jallh ij leah, maahta gïerve årrodh partnerasse daelie. Dovne abortedåastovisnie jïh noeredåastoevisnie maahta giem akt råakedh jïh dejnie soptsestalledh, oktegh jallh gåabpatjahkh.
Aborten mænngan maahta domtedh dovne hujnies jïh girmes. Domtesh jïh åssjaldahkh maehtieh tïjjen mietie molsestalledh jïh muvhten aejkien dah båetieh guhkiem aborten mænngan.
Jilhts guhkiem aborten mænngan maahta bïeljielidh vuesiehtimmien gaavhtan noeredåastoevasse jïh giejnie soptsestalledh guktie domtedh.
Gåessie maahta abortem darjodh?
18. nåajsanvåhkoen raajan reaktam åtna abortem darjodh jïh ij daarpesjh jiehtedh mannasinie sæjhta dam darjodh.
18. nåajsanvåhkoen mænngan tjuara luhpiem Socialeståvroste åadtjodh åvteli maahta abortem darjodh. Luhpiem ajve åådtje jis sjïere sjïekem gååvnese abortem darjodh. Vuesiehtimmien gaavhtan dan noere lea, dåeriesmoerem åtna alkohovline jallh drogigujmie, daaresjimmiem sjïdteme jallh jiemie ålvas skaaram åtna.
Gusnie abortem darjodh?
Abortem åålegh skïemtjegåetesne jallh jeatjah spesialisteklinihkesne dorje, ij maehtieh vuesiehtimmien gaavhtan abortem darjodh noeredåastoevisnie. Mohte jis daajra nåajsan jïh ussjede abortem darjodh maahta noeredåastovem bïeljelidh jïh raeriem åadtjodh. Maahta aaj hoksejarngese jallh gynekologese vaedtsedh. Dah aaj maehtieh viehkine årrodh abortedåastovem skïemtjegåetesne bïeljelidh.
Maahta aaj jïjtje ryöktesth abortedåastoevasse ringkedh jïh tïjjem dongkedh. Jis daajra sæjhta abortem darjodh dellie hijven tïjjem dongkedh dan varki man gåarede juktie naan aejkien tjuara vuertedh såemies dåastoevinie.
Guktie abortem dorje?
Aborte maahta ovmessie vuekine darjodh. Man vuekiem veeljie nænnoste man guhkiem nåajsan orreme. Minngemes gujnielemmien voestes biejjie aalka ryöknedh jïh destie daajra man nåajsanvåhkoe sjædta. Ij ryöknh destie gosse maanadovvedh.
Åktseden våhkoen raajan
Åktseden våhkoen raajan maahta abortem darjodh daalhkesh viehkine. Dïhte medisijnen abortem gohtje. Såemies sijjine dam vuekien nåhtadieh luhkiemubpie våhkoen raajan. Dellie tabledtem abortedåastovisnie åådtje, dïhte ij leah seamma goh akute-p-pillere. Dan mænngan tabledtem vaalteme åådtje gåetide vuelkedh.
Akte jallh göökte biejjiej mænngan dåastoevasse bååstide båata jïh orre daalhkesem åådtje, tabledth mejtie njilliedidh jallh tsavnoen sïjse rijtedh. Dåastoevisnie orre jïh naan tæjmoej mænngan aalka vertedh jïh jijmiem luejhtedh. Kaanne baektjede men dellie åådtje daalhkesh guktie ij dam damth jïh seamma biejjien åådtje gåetide vuelkedh.
Maahta aaj abortem gåetesne orrijidh, guktie hïejmeabortem gohtje. Dellie åådtje dah mubpieh tabledth jïh dejtie gåetesne vaeltedh. Åådtje hïejmeabortem darjodh jis båarasåbpoe goh 18 jaepien båeries jïh naan jeatjah geerve almetje aaj gåetesne.
Naan våhkoeh aborten mænngan bååstide gynekologese jallh tsegkietnese båata jïh orre nåajsanteestem darjodh jïh soptseste guktie gåerede. Dellie medisijnen abortem tjïrrehtamme. Såemies aejkien aaj gïehtjede vååksje ij maam akt aajmene vuesiehtimmien gaavhtan boernesgåetien sisnie. Jis maam akt aajmene dellie maam gohtje skreepemem darjodh jïh dellie mojhteleslaakan dah bielieh mah aajmene destie njamma. Jis daarpesje dam nahkerisnie darjodh.
12 våhkoen raajan
12 våhkoen raajan maahta guktie gohtje kirurgijen abortem darjodh, dellie skreepemem dorje. Operasjovnem dorje gosse nahkerisnie. Dåaktere dïrregem boernesgåetien sïjse rijtie. Dïrrege lea njammadimmiem ektiedamme. Mojhteleslaakan jiemiem jïh olkese boernesgåeteste njammadidh. Dïhte medtie 20 minudth vaalta. Dan mænngan dåastoevisnie orre måedtie tæjmoeh jïh lïegkedidh. Naan våhkoeh dan mænngan muvhten aejkien åådtje bååstide båetedh.
12 våhkoen mænngan jïh 18 våhkoen raajan
12 våhkoen mænngan tjuara abortem göökte daltesinie darjodh. Voestes åådtje daalhkesh dåastoevisnie mah leah seamma såarhth tabledth mah aareh abortem nåhtadidh. Göökte biejjiej mænngan bååstide dåastoevasse båata jïh orre daalhkesh åådtje mah tjaskane boernesgåetiem guktie jiemiem luejhtedh.
Daate mahte seamma goh onne baersieldimmie jïh baektjede seammalaakan goh gosse baersieldidh. Man guhkiem jeerehtse, naan tæjmoeh raejeste såemies dygnh raajan, mohte jeenjemes dygnem ryöhkoe. Dam tïjjem skïemtjegåetesne orre. Gosse abortem galhkeme dåaktere boernesgåetiem goerehte. Jis maam akt aajmene dellie daarpesje boernesgåetiem skreepedh. Naan våhkoeh aborten mænngan åådtje såemies aejkien bååstide båetedh.
18 våhkoen mænngan
18 våhkoen mænngan luhpiem ajve åådtje jis sjïere sjïekem gååvnese abortem darjodh. Abortem seammalaakan dorje goh våhkoeh 12 jïh 18 gaskem.
Man dovres aborte?
Maam aborte maaksa jeerehtse gusnie laantesne årroeminie. Jïjnjh sijjine ij daarpesjh maeksedh jis nuerebe 20 jaepeste. Jis tjuara maeksedh dellie medtie 300 kråvnah. Jis sæjhta daejredh man jïjnjh edtja maeksedh gusnie årroeminie dellie maahta gihtjedh dah gïeh berkieh noeredåastoevisnie jallh tsegkietniedåastoevisnie. Aaj hijven gåarede abortedåastovem bïeljielidh.
Tjuerieh eejhtegh jallh åelieh dam daejredh?
Barkijh dåastovinie sjeavohtsvoetedïedtem utnieh. Mohte jis edtja abortem darjodh dellie hijven jis naaken gie maahta dåarjoem årrodh dovne aborten åvteli jïh mænngan. Jis noere barkijh pruvhkieh raeriestidh eejhtegh jallh jeatjah åelieh åadtjoeh daejredh edtja abortem darjodh. Jis ij gåaredh gåetesne jiehtedh edtja abortem darjodh kaanne maahta jeatjah geervese jiehtedh maam leahtade. Dïhte maahta årrodh geerve åerpene, maadtoeladtje, kuratovre jallh skïemtjesåjhtere skuvlesne jallh jeatjah årrodh gie maahta dåarjodh.
Jis eejhtegh jallh jeatjah åelieh gaskesadta sjïekenisnie vuarjesje jïh gaskem jeatjebem dam dorje jis dam jïjtse sæjhta, mah sjïekh jïh man båeries. Jis lïhkebe 18 jaepien båeries dellie eejhtegh jallh jeatjah åelieh unnebe reaktam utnieh daejrieh dan gaskesh hoksine. Jeenjemes maahta barkijigujmie mah råaka digkiedidh guktie edtja darjodh. Jis dah eejhtegh jallh jeatjah åelieh gaskesadtedh dellie åådtje åålegh dam daejredh.
Jis lea naemhtie eah eejhtegh jallh jeatjah åelieh edtjh daejredh sæjhta abortem darjodh, juktie dellie maam akth maahta deahpadidh, eah hoksebarkijh dejtie gaskesadth. Abortem darjodh ij edtjh destie sjïdtedh vaahrese båetedh.
Maahta dellie viehkiem åadtjodh kuratovreste jallh jeatjah dåarjoejistie.
Aborten mænngan
Biejjieh aborten mænngan hijven lïegkedidh. Dah voestes biejjieh jïh kaanne våhkoem baektjede, medtie goh gujnelemmievaerhkie. Våhkoeh aborten mænngan pråvhka vertedh medtie seamma goh gujnelemmie jallh kaanne ånnetji vielie. Man guhkiem varta persovneste persovnese juaka jïh gaskem jeatjebem mestie man vuekie abortem dorjeme. Dan guhkiem varta ij edtjh seksem utnedh, tampongem nåhtadidh jallh laavkodh dannasinie maahta ovledh. Medtie njieljie govhte våhkoej mænngan pråvhka viht gujnelemmie bååstide båetedh.
Aborten mænngan naan girmes damta mohte jeatjah hujnesne. Dah domtesh maehtieh tïjjen mietie molsestalledh jïh muvhten aejkien dah båetieh guhkiem aborten mænngan.
Jilhts guhkiem aborten mænngan maahta bïeljielidh vuesiehtimmien gaavhtan noeredåastoevasse jïh giejnie soptsestalledh guktie domtedh. Dam maahta darjodh dåastoevisnie gusnie abortem dorjeme jallh vuesiehtimmien gaavhtan noeredåastoevisnie.
Såemies aejkien ij nahkesjh, tuhtjie dan noere jallh ij heavedh daelie. Kaanne dïhte gie ektesne nåajsan sjïdteme ij leah dïhte gie sæjhta maanadovvedh. Reaktam åtna abortem darjodh jïh ij daarpesjh dam jeatjide goerkelidh, seamma man sjïekenisnie. Dïhte lea abortelaakesne tjaaleme. Reaktam aaj åtna jarkesidh gåess´akt aborten åvteli.
Ij gååvnesh naan jaepieraastem abortem darjodh.