Akute-p-pillere lea vuekie båavhroeh heerredh jis joe ovvaarjedimmie negkeme, vuesiehtimmien gaavhtan jis åajaldehti vaarjedimmiem utni, idtji dam pryjjh jallh jis seksuellen daaresjimmiem dååjri.
Byöroe aaj akute-p-pillerem vaeltedh jis vaahra gååvnese vaarjedimmiem maam utni idtji juhtieh, vuesiehtimmien gaavhtan jis kondomem loedteni jallh jis p-pillerem bæjjese tjulli.
Tabledtesne gestagen (gulkroppshormone). Dïhte dorje guktie ij munnieh slapkoeh, jallh seentebe sjædta.
Gestagene aaj sïejhme p-pillerinie, mohte jeenebe gååvnesieh akute-p-pillerisnie. Destie maahta dah lissiedåårresh damtedh jïlhts ij leah sïejhme.
Akute-p-pillere edtja ajve baenhtsesne jïh ij goh sïejhme båavhroehvaarjedimmie.
Akute-p-pillere ij båavhroeh heerredh jïh dan gaavhtan ij leah seamma goh aborte jallh guktie gohtje abortepillere.
Guktie akute-p-pillerem nåhtede?
Muvhten aejkien akute-p-pillere gohtje biejjien-mænngan-pillerem. Dïhte ånnetji båajhtode guktie ij daarpesjh tabledtem vaeltedh biejjien mænngan negkeme. Akute-p-pillerem maahta 72 tæjmoeh, golme dygnh, negkemen mænngan jis galka juhtedh.
Jis tabledtem varki vaalta dellie vaahra nåajsan sjïdtedh vaenede. Biejjien jallh biejjiej mænngan akute-p-pillerem veelti maahta vartajidh, mohte jeanatjommesh eah dam åadtjoeh.
Gååvnese aaj sjïere akute-p-pillere maam maahta vïjhte dygnine ovvaarjedamme negkemen mænngan vaeltedh. Dam åådtje ajve receptesne tsegkietneste jallh dåaktaristie.
Jis dagkeres receptem daarpesje maahta noeredåastovem, sekse- jïh ektiejielemedåastovem, hoksejarngem, tsegkietniedåastovem jallh nyjseneklinihkem bïeljelidh. Daamhtaj tjuara dan åvteste maeksedh. Naan dåastoevinie maahta dam namhtah åadtjodh.
Gusnie akute-p-pillerem åådtje?
Maahta akute-p-pillerem åadtjodh jeenjemes noeredåastoevinie, sekse- jïh ektiejielemedåastoevinie jïh hoksejarngine.
Maahta aaj aktue-p-pillerem åadtjodh naan tsegkietniedåastoevinie jïh nyjseneklinihkine.
Maahta aaj dejtie apotekesne åestedh recepten bielelen.
Jis vuesiehtimmien gaavhtan noeredåastoevasse vualka akute-p-pilllerem åadtjodh maahta aaj orre tïjjem åadtjodh teestedh jis nåajsan sjïdteme jïh, jis sæjhta, klamydiateestem vaeltedh.
Maahta aaj raerieh åadtjodh guktie maahta båavhroej vööste vaarjedidh jïh tjoeleskïemtjelassh heerredh jis dam sæjhta.
Man dovres akute-p-pillere?
Jis akute-p-pillerem apotekesne åasta receptem bielelen, dellie tjuara dej åvteste maeksedh. Noeredåastoevisnie åådtje tabledtem namhtah.
Man vihties akute-p-pillere?
Vaahra nåajsan sjïdtedh mænngan tabledtem vaalteme lea onne. Vaahra ij akute-p-pillerem juhtieh, dïhte sæjhta jiehtedh nåajsan sjædta, jienede gosse tïjje vaasa negkemen mænngan jïh goske pillerem vaalta.
Jis voeksede golme tæjmoeh raejesne dan mænngan tabledtem vaalteme jallh jis tjåejjieh skorkestieh ij leah vihties kråahpe jaksa hormonem baajnedh. Dannasinie tjuara orre tabledtem vaeltedh dan varki man gåarede, juktie vaahra sjædta nåajsan sjïdtedh.
Guktie daate akute-p-pillere jåhta maam vaalta maahta bipacksïetelisnie lohkedh. Bipacksïetele lea dïhte sïetele mij lea aeskesne gosse åådtje jallh åasta akute-p-pillerem. Maahta åålegh tsegkietniem gihtjedh vuesiehtimmien gaavhtan noeredåastoevisnie jallh njaltje- jïh tjoeledåastoevisnie jis gaajkerde.
Jis vihties sæjhta årrodh idtji nåajsan sjïdth byöroe båavroehteestem darjodh medtie golme våhkoej mænngan tabledtem vaalteme.
Man daamtaj maahta akute-p-pillerem vaeltedh?
Ij naan raaste gååvnesh man gellie aejkieh gujnielemmie-cykelisnie maahta akute-p-pillerem vaeltedh. Jis ovvaarjedamme negkemem utni jïh ij sïjhth nåajsan sjïdtedh dellie buerebe akute-p-pillerem vaeltedh gellie aejkien seamma gujnielemmie-cykelisnie enn ij dam vaeltieh, jïlhts vaahra gaskevertemh jeanede.
Jis tjuara akute-p-pillerem gellien aejkien vaeltedh byöroe ussjedidh guktie edtja vaarjedidh gosse negkedh jïh jis maahta dam jeatjahtehtedh. Viehkine maahta noeredåastovem, hoksejarngem jallh njaltje- jïh tjoeledåastovem bïeljelidh.
Aevhkieh
- Jis ij leah vaarjedamme jallh jis dïhte vaarjedimmie idtji juhtieh lea daate vuekie mestie vaahra vaenede maanadovvedh.
Slearesh
- Akute-p-pillere ij tjoeleskïemtjelassi vööste vaarjedh.
- Hormone maahta tsevtsedh guktie vuesiehtimmien gaavhtan åejjieh saejriedieh, njammah sprenkieh jallh skïjmestalla, mohte daamhtaj ij ryöhkh guhkebe goh dygnem.