Maahta kondomen nåhtadidh tjoeleskïemtjelassi vööste ovmessie seksine v.g. dååkerdidh, anaaledååkerdimmie jïh jis njaelmiesekse boetjine åtna. Dååkerdimmine aaj vaarjele guktie ij baavijehtjieh.
Maahta aaj kondome nåhtadidh gosse onaneeredh, jis sæjhta buerebe sjïdtedh dam tseegkedh jïh daajra guktie damtedh gosse boetje-goglenassh kondomenasse båetieh.
Kondomh ovmessie stoeredahkh, hammoeh, klaerieh jïh smååhkh gååvnesieh. Jienebh kondomh mejtie maahta bovresne åestedh mahte seammalaakan, mohte maahta aaj jeatjah stoeredahkh, hammoeh gaskeviermesne jïh seksebovrine gaavnedh.
Ovmessie kondomh sjiehtieh ovmessie boetjide jïh dan gaavhtan hijven dejtie pryövedh goske kondomem gaavnedh maam lyjhkoe.
Jienebh kondomh bådtjaldahkesne juktie maereles jïh eah skoepenh.
Jis lateksistie (gummije) siknjede maahta kondomidie mah plastihkeste nåhtadidh.
Guktie kondomem nåhtede?
Kondome garre boetjese jallh seksegaavnan beaja. Jis kondeme galka tjoeleskïemtjelassi vööste vaarjelidh jïh ij baavijehtjieh vihkeles dam abpe dååkerdimmesne åtna.
Jis kondomenasse båata dellie tjuara geehtedh gosse boetjem olkese geasa guktie ij boetje-goglenassh skornjese jallh anaalese båetieh.
Kaanne daarpesje heerjehtalledh kondomem aajmoelaakan tseegkedh. Jis boetje maahta dejnie heerjehtalledh dïsse dam bïejedh gosse onaneeredh. Jis ij leah maahta dildoem jallh viskesroehtsem utnedh gosse heerjehtalledh.
Naemhtie dorje gosse galka kondomem boetjese jallh dildoem tseegkedh:
- Rïhpesth kondome-aeskiem.
- Jårresth kondomem ånnetji vååjnoes guktie dam edtja tseegkedh.
- Jis kondomem boetjese tseegkie, dam galka garres årrodh gosse kondomem dïsse jårrestidh.
- Gïesh åvtenjaltjam bååstede.
- Bïejh kondomem boetjegeatjan, dïedtesth soermigujmie bijjemes guktie ij naan bïegke-bollenjes sjædta gosse kondomem våålese jårresth, kondomen jïh boetjen jallh dildoem gaskem.
- Gosse kondomem våålese jårrestamme, gïesh dam ånnetji bæjjese viht jïh gïesh våålese guktie ij vielie aajmene jårrestidh. Jis kondome boetjen nelnie galka dam olkese gïesedh gosse garres. Kondomem råådtege steerh boetjen maadtegisnie, gosse boetjem olkese gïesh, guktie ij kondome destie njïejkedh.
- Sleengkh kondomem tsumhtsielæhtan. Aellieh dam toaledtese bïejh.
Gusnie kondomh åådtje?
Daamhtaj noeredåastove kondomidie vadta jallh duaka.
Maahta aaj dejtie daalhkesebovresne, beapmoebovresne, tjååskesne jallh viermesne åestedh. Maahta aaj dejtie automateste biografine, restaurangine jïh klubpine åestedh. Jienebh joekehts kondomh gååvnesieh seksebovrine jïh gaskeviermesne.
Man dovres kondomh?
Daamhtaj jienebh kondomh paahkesne jïh dej åasah jarkesieh dan mietie mij kondomidie veeljie jïh gusnie dejtie åasta. Noeredåastovisnie dah kondomidie namhtah juekieh jallh aelpebe duekieh.
Man vihties kondome?
Kondome vihties vaarjelimmie tjoeleskïemtjelassi vööste jïh ij baavijehtjieh jis aajmoelaakan nåhtadidh, abpe tïjjem gosse dååkerdeminie jïh fïerhten aejkien gosse dååkerdeminie.
Edtja dah kondomh våarhkodh rommetemperatuvresne jïh sijjesnegusnie ij skoepenh. Hijven sijjieh lea vuesiehtimmien gaavhtan jaagkanlåammesne jallh veaskosne.
Nåake sijjieh lea vuesiehtimmien gaavhtan måvhkan låammesne jallh biejjiebaeriehkisnie. Kondome mij båeries jallh råadtsoeh aelhkebe loedtene.
Aevhkieh
- Hijven vaarjelimmie tjoeleskïemtjelassi vööste.
- Vihties vaarjelimmie ij baavijehtjieh.
- Ij kråahpem tsevtsieh.
Slearesh
- Maahta stuvredh juktie maahta dam dïsse bïejedh dan mænngan boetje garres sjædta.
- Tjuara dejtie utnedh gosse sæjhta dååkerdidh.
- Daarpesje dejnie heerjehtalledh guktie aelhkies dam dïsse tseegkedh jïh aajmoelaakan damtedh.
Aellieh njaltjabadtjam jallh ååljam nåhtedh!
Ij edtjh ååljam jallh njaltjabadtjam nåhtadidh vaarjelimmiej ektesne mestie lateksistie (gummije) goh kondome, femidome jïh njåalomedoengese. Buejtie maahta vaarjelimmiem smålledidh jïh dellie aelhkebe loedtene.
Nåhtede tjaetsien- jallh silikonebaasereme badtjam hijven gåerede lateksevaarjelimmine.
Ovmessie badtjah gååvnesieh: tjaetsiebaasereme, silikonbaasereme jallh badtja mestie gåabpatjahkijste. Dejtie maahta gaajhkh vaarjelimmieh ektesne nåhtadidh.