Jis ussjede guktie edtja darjodh gosse tjuvliestidh jallh gijhkierdidh, maahta hijven jïermestalledh ij naan njoelkedassh dïsse gååvnesh guktie dam darjodh. Jis pryövoe jïh vuekine dam darjodh maam hijvenlaakan damta jïjtsasse dellie aaj hijven damta dïsse gïem tjuvleste jïh gijhkerde aaj.
Tjonnesh
Tjonnestidh lea gosse bangsemh jeatjaj bangsemidie dïedtese jallh jeatjah sijjide naakenen kråahpesne, daamhtaj aaj ohtje tjoejem seammasïenten dorje. Gosse tjonnestidh dellie njaelmiem gaptjeme.
Tjuvlieh
Gosse tjuvleste dellie pruvhkieh dovne bangsemh jïh njoektjemh sinsitniem doehtedidh. Dïhte lea guktie gaajesje jïh gaajesjåvva njoektjeminie jïh bangsemigujmie. Maahta aaj bïhkedidh guktie naakenem maejstedh. Sïejhme vuekie gosse tjuvliegåata lea aelkiejægan tjonnestidh. Sæjhta dellie tjuvliestidh maahta njaelmiem ånnetji rïhpestidh jïh njoektjeme-gietjiem ohtj’ånnetji mubpien bangsemidie njoeledh. Dellie åådtje vuejnedh jis dïhte aaj sæjhta tjuvliestidh jïh sinsitnien njoektjemidie doehtedieh.
Ij naan njoelkedassh gååvnesieh guktie edtja darjodh gosse tjuvliestidh, vuesiehtimmien gaavhtan man guhkies edtja njoektjemen mubpien njaalman rijtedh jallh man jïjnje edtja njaelmiem rïhpestidh, dam jïjtje nænnoste. Daamhtaj pråvhka dam iemeles laakan sjïdtedh gosse naakenem tjuvleste. Mohte raereste mojhteleslaakan aelkedh guktie ij njoektjemem tjarki rijth jïh alvas dam svihtjie mubpien njaelmesne. Hijven gujht gåabpatjahkide pråvhka sjïdtedh jis haarjanidh.
Gïerve tjuvliestidh ryöktesth åvtelistie juktie dah njuenieh aelhkie bunhkieh, dan gaavhtan pråvhka åejjiem raagkedidh guktie buerebe sjædta. Aelhkemes njuenine voejngehte gosse tjuvleste. Åådtje pryövedh guktie tuhtjie bööremes.
Hijven gåerede tjuvliestidh baenieregulereminie jallh piercinginie.
Maahta aaj sinsitniem kråahpesne tjuvleste. Gusnie kråahpesne tjuvleste jallh sæjhta tjuvliestidh jïjtje nænnoste mubpine ektesne giem tjuvleste jallh gie tjuvleste.
Faerhmieh jïh gaajesjimmieh
Maahta njaelkies-ligke damtedh mubpien kråahpem domhkestidh, vuesiehtimmien faerhmiestidh jïh gaajesjidh. Maahta gaajesjidh jïh faerhmiestidh dovne vaarjohts jïh vaarjoejgujmie.
Gijhkierdimmie
Guktie gijhkerdeminie? Gijhkierdidh pråvhka dam gohtje gosse tjuvliestidh, tjonnestidh, faerhmiestidh jïh gaajesjidh. Gosse tjuvleste jïh faerhmeste seammasïenten maahta gohtje gijhkierdimmie. Seamma goh jis kråahpem gaajesje jïh tjonneste aaj maahta gijhkierdimmiem årrodh. Gosse gijhkerdeminie maahta aaj sinsitnine pruvvedadtedh.
Maahta ovmessie vuekine gijhkierdidh, vuesiehtimmien gaavhtan joeleds jïh sealoes jallh tjarke jïh tjimkeslaakan. Daamhtaj dïhte jeatjahtahta gosse dam darjoeminie. Maahta aaj jeatjahtahta aejkeste aajkan jïh persovneste persovnese. Maahta gijhkierdidh gosse jïjnjh vaarjoeh, jallh vaarjohts jallh båadtsode. Maahta aaj ovmessie vuekine gijhkierdidh, vuesiehtimmien gaavhtan gosse tjåadtjoejægan, tjahkasjægan jallh gællasjægan.
Jïjnje gijhkierdeminie vaarjohts muvhtene gohtje kruepiegijhkierdimmie.
Struledh
Muvhth gåhtjoeh gijhkierdimmiem struledh. Mohte struleme maahta aaj jeatjah darjomh årrodh. Muvhth vienhtieh vuesiehtimmien gaavhtan dah strulieh gosse tramhkoehtieh jallh seksem utnieh mubpine jallh mubpiejgujmie. Persovne giejnie dam dorjeme aaj gohtje strule.
Maam darjoeh tjuvlieh jïh gijhkierdimmie njaelkies-ligke?
Lïhke årrodh jïh jis naan datnem gaajesje dam dorje guktie njaltja, njoektjeme jïh bangsemh seahkarieh jïh signaalh aajlese seedtieh, daate damta gïeltegs jïh njaelkies-ligke. Maahta aaj dorje geajhkeres sjædta. Dïhte lea dah nervh kråahpesne mejtie domtesh gïetedieh jïh signaalh aajlese seedtieh. Guktie edtja damtedh gïeltegs jïh njaelkies-ligke gosse gijhkerdeminie dïhte vihkeles dovne jïjtje dïhte mubpie giejnie gijhkerdeminie dam sæjhta.
Ovmessie persovnh ovmessie lyjhkoeh tjuvliestidh jïh gijhkierdidh. Ij gååvnesh naan reaktoe jallh fïejle vuekiem damtedh, jïlhts tjuara jïjtsasse govledh jis tuhtjie njaelkies-ligke tjuvliestidh jïh gijhkierdidh jallh sæjhta gujht lïhkevoetem damtedh jeatjah vuekine.
Åålegh reaktam åtna jiehtedh jis ij sïjhth tjuvliestidh jallh gijhkierdidh, jallh jis maam akt ij hijven damth gosse dam dorje. Ij edtjh gåessie tjuvliestidh jallh gijhkierdidh barre jis naan jeatjah dam sæjhta.
Smaahke jïh hapsoe
Gaajhkesh ovmessielaakan smååhkedieh jïh hepsieh. Guktie smååhkede jïh hepsie aaj jeatjahtahta, vuesiehtimmien gaavhtan dan gaavhtan maam lea byöpmedamme, guktie bïssedamme, guktie vaarjoeh hepsieh jïh novh vijresåbpoe. Jis sovhtine jïh infeksjovnem åtna dellie maahta vuesiehtimmien gaavhtan njaelmeste rovnegs hepsedh enn pråvhka.
Maahta nåajsan sjïdtedh jallh tjoeleskïemtjelassh åadtjodh jis gijhkierdamme
Ij maehtieh nåajsan sjïdtedh gijhkierdimmeste. Ij maehtieh tjoeleskïemtjelassem destie åadtjodh. Gijhkierdimmie lea murries jïh vihties vuekie naakenem lïhke årrodh.