Duodje- ja oahpaheaddjeoahpuid dieđagoahti
Sámi skuvllat, sámi mánáidgárddit ja duodji&design leat min ossodaga oahpuid guovddážis. Sámi ja eamiálbmot fáttat leat dehálaš oasit Sámi allaskuvlla duodjeoahpuin ja oahpaheaddjioahpuin. Duodjeoahpus lea sihke árbevirolaš duddjon ja ođđaáigásaš hábmen (design). Sámi oahpaheaddjioahput leat sámegillii ja gávdnojit dušše fal Sámi allaskuvllas. Dat leat geabbilis oahput: oahpahus lea neahta ja deaivvademiid bokte.
Vuođđoskuvlaoahpaheaddjeoahput rivdet 5-jagi masteroahppun čavčča 2017 rájes. Sámi allaskuvla lea sádden sámi oahpaheaddjioahpuid masteriid (1-7, 5-10) akkrediterenohcamuša čakčamánus 2016.
Duodje- ja oahpaheaddjeoahpuid dieđagoahtái gullet čuovvovaš oahput:
- Duodji bachelor- ja masterprográmmat
- Vuođđoskuvlla oahpaheaddjeoahput VUO 1-7 ja VUO 5-10
- Mánaidgárddeoahpaheaddjioahppu (MOA)
- Praktihkalaš pedagogalaš oahppu (PPO)
Manin lea dehálaš váldit dáid oahpuid?
- Sámi servodat dárbbaša olbmuid geain lea alit oahppu duojis ja design-suorggis.
- Sámi mánáidgárddit ja skuvllat dárbbašit oahppan sámegielat oahpaheddjiid.
- Sámi oahpaheaddjioahput addet oahpaheaddjigelbbolašvuođa sihke Norggas, Suomas ja Ruoŧas.
- Sáhtát bargat maiddái stuoraservodaga mánáidgárddiin ja skuvllain, mat dárbbašit oahpaheddjiid geain lea gelbbolašvuohta sámegielas ja sámi kultuvrras.
- PPO addá vejolašvuođa bargat fágaoahpaheaddjin nuoraidskuvllain ja joatkkaskuvllain.
