BA - Sierra kursa
BOA100 Boazodoallofága metoda; vuođđokursa
- Oahpahusgiella: Davvisámegiella, muhto sáhttet maid leat logaldallamat eará skándinávalaš gielaide dehe eŋgelasgillii.
- Oahpahusbáiki: Sámi allaskuvllas
- 10 oahppočuoggá
- Oahppoplána
Dán oahpus oahpat guorahallat dutkama. Dieđalašvuođa ságastallamis geavahuvvojit sierra doahpagat, mat leat oassin dieđateoriijas. Dán oahpus beasat oahpásmuvvat dieđateoriija doahpagiidda. Oahpus oahpat maid mii lea metoda, metodologiija, kvalitatiiva metoda ja kvantitatiiva metoda, ja mat leat váldoearut dáin. Oahpásmuvvat boazodoalodutkamii lea maid oassin oahpus. Don oahpásmuvat dieđalaš jurddašeapmái ja dutkanmetodaid geavaheapmái. Oahppu lea bákkolaš oassi Sámi allaskuvlla boazodoalooahpuid bacheloras, muhto heive maid buohkaide geat háliidit oahppat čađahit dutkanbargguid. Heive earenoamáš bures jus áiggut gráda čađahit alit oahpus
Sisabeassangáibádusat
- Dábálaš sisabeassangáibádusat alitoahpahussii.
- Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje realagelbbolašvuohta.
- Lassin galgá sámegiela máhttu vuosttaš- dahje nubbingiellan joatkkaskuvllas dahje vástideaddji (omd. sámegiela lohkanbadjeoahppu). Studeanttas lea maid vejolašvuohta duođaštit iežas sámegiela lohkangelbbolašvuođa sierra sisabeassangeahččaleami bokte.