DUO Duddjon ja sámegiella (Giron)
- Oahpahusgiella: Sámegiella
- Oahpahusbáiki: Giron
- Viidodat: 15 oahppočuoggá
- Lohkanbadjeplána
- Oahppoplána
Sisdoallu
Duddjon ja sámegiella –oahppu sisttisdoallá duddjoma ja dan oktavuođas sámegiela njálmmálaš ja čálalaš hárjáneami, maiguin studeanta čiekŋuda iežas duodje- ja giellamáhtu. Oahppu deattuha geavatlaš duddjoma ja studeantta aktiivvalaš sámegiela geavaheami. Duoji oahpahusas vuodjut sierralágan hábmema ja duddjoma vugiide, ja ávdnasiid, teknihkaid ja reaidduid geahččaleapmái. Duoji ja duddjoma lahkoneamis vuolggasadjin leat lagaš luonddu- ja kulturbirrasat ja daidda mihtilmas duodjeárbevierut. Hábmema lahkonit bistevaš designa geahččanguovllus. Giela oahpahus sisttisdoallá láidehusa jietnadatnjuolggadusaide, sojahanohppii ja cealkkaohppii. Oahpus suokkardallat giela mearkkašumi duoji máhttima oassin. Ohppui gullá geatnegahtton suodjaluskursa, mii lea eaktun oassálastit oahpahussii.
Duddjon ja sámegiella juhkkojuvvo guovtti (2) fáddájovkui:
1) Duddjon 10 oč
2) Geavatlaš giellageavaheapmi ja giellateoriija 5 oč.
Sisabeassangáibádusat
Obbalaš lohkangelbbolašvuohta dahje reálgelbbolašvuohta. Sámegiela gáibádusa sáhttá deavdit čuovvovaš vugiid mielde: Sámegiella 1. dahje 2.giellan joatkkaskuvllas, Suoma bealde logahaga eatnigielladutkkus dahje guhkes amasgielladutkkus ja Ruoŧa bealde Modersmål A, B ja C dahje dušše A ja B. Sámegielagáibádusa sáhttá maiddái deavdit davvisámegiela lohkanbadjeoahpuin (30 oč) dahje vástideddjiin, dahje ceavzit giellageahččaleami, man Sámi allaskuvla lágida.
Duojis ohcci galgá duođaštit duodje- dahje dáidda- ja hábmenfágalaš gelbbolašvuođa, mii sáhttá leat fágabreava duojis, duodjeoahput duodjeskuvllas dahje eará vástideaddji duodjeoahppu. Ohcciin geain lea duddjonhárjáneapmi, galget duođaštussan buktit sisa 4-5 iešguđetlágan duoji.
