Sámi allaskuvla lea njunuš alit dási oahppo- ja dutkanásahus Sámis ja eamiálbmot máilmmis. Sámi allaskuvllas lea dutkan máŋgga dieđasuorggis. Dutkan fátmmasta gielladiehtaga, kultuvrra, boazodoalu ja eará árbevirolaš ealáhusaid, árbevirolaš dieđuid ja máhtuid, báikenamaid, servopdaga dálá dili ja historjjá, riektedutkama báikkálaš, našunála ja riikkaidgaskasaš dásiin jna. Sámi allaskuvla aktiivalaččat ovddida sámedutkama eamiálbmotdutkama oassin.

Oassi Sámi allaskuvlla dutkandoaimmain ruhtaduvvo Davviriikkaid ministtárráđi bokte (Nordisk ministerråd/Nordic Council of Ministers). Dat lea ovddeš Davviriikkalaš Sámi Instituhta (Nordisk Samisk Institutt/Nordic Sami Institute) árbi. Instituhtta lei ovttastuvvon Sámi allaskuvllain 2005:s.

Sámi dutkamis lea dehálaš mearkkašupmi sámi servodagaid sihkkarastimis ja ovddideamis boahtteáiggis. Juohke eamiálbmotservodat dárbbaša hukset iežas dieđalaš gelbbolašvuoða, skuvlet iežas áššedovdiid ja ovdánit seammaárvosažžan stuoraservodagain.

WINHEC (World Indigenous Nations Higher Education Concortium) miellahttoásahussan Sámi allaskuvla čuovvu dutkandoaimmainneaset WINHEC Dutkanehtalaš neavvagiid (WINHEC Research Standards).

Sámi allaskuvla almmuha dieđalaš čálaráidduid nu go Dieđut ja Raporttat. Ovttas Tromssa universitehta Sámi dutkamiid guovddážiin Sámi allaskuvla lea badjel 20 jagi almmuhan Sámi dieđalaš áigečállaga. Dát lea máilmmi áidna dieđalaš áigečála sámegillii ja das lea fágaguoibmeárvvoštallanortnet (referee).

• Publikašuvnnat