BA - Sierra kursa
JOU Journalistihka giellagáhtten 1
- Oahpahusgiella: Davvisámegiella
- Oahpahusbáiki: Sámi allaskuvllas
- 5 oahppočuoggá
Sisdoallu
Giellagáhtten 1 lea láidehus giellagáhttemii. Giellagáhtten 1:ža figgamuššan lea buoridit studeanttaid gielalaš diđolašvuođa ja čalmmustahttit journalistta rolla gielalaš váikkuheaddjin sámi servodagas. Studeanttat ohppet muhtun guovddáš giellagáhttenáššiid: lohkosánit, adjektiivvaid veardidanhámit, kásusiid geavaheapmi, infinihttahámit ja konditionála. Iešguhtege ášši analyserejuvvo journalisttalaš teavsttain ja studeanttaid iežaset čállosiin čoggojuvvon ovdamearkkaid vuođul. Dasa lassin studeanttat ohppet geavahit giellaoahpaid, sátnegirjjiid ja interneahta materiálaid ee. kártasiidduid veahkkeneavvun.
Oahppu lágiduvvo Journalistihka bachelorprográmma oassin, muhto lea maid rabas earáide jus lea sadji.
Sisabeassangáibádusat
- Sámi allaskuvlla vuođđooahpuid oppalaš sisaváldingáibádusat leat oppalaš lohkangelbbolašvuohta dahje reálagelbbolašvuohta ja sámegiella.
- Sámegiela gáibádusa sáhttá deavdit čuovvovaš vugiid mielde: Sámegiella 1. dahje 2. giellan joatkkaskuvllas, Suoma bealde logahagas eatnigiela dutkkus dahje vierrogiela dutkkus ja Ruoŧa bealde Modersmål A, B ja C dahje dušše A ja B.
- Sámegiela gáibádusa sáhttá maid deavdit Sámegiela lohkanbadjeoahpuin 30 oč dahje vástideddjiin, dahje ceavzit sámegiela geahččaleami man Sámi allaskuvla lágida.